തിരുവനന്തപുരം: സി.എം.ആർ.എൽ-എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട അന്വേഷണം ശക്തമാക്കി എൻഫോഴ്‌സ്‌മെന്റ് ഡയറക്ടറേറ്റ്. സ്ഥാപനത്തിലെ കൂടുതൽ ഉദ്യോഗസ്ഥരിലേക്ക് ചോദ്യം ചെയ്യൽ വ്യാപിപ്പിക്കാനാണ് ഏജൻസിയുടെ തീരുമാനം. ചോദ്യം ചെയ്യലിന് നേരിട്ട് ഹാജരാകാൻ നിർദ്ദേശിച്ച് ജീവനക്കാർക്കും ഓഡിറ്റർമാർക്കുമടക്കം ഏഴ് പേർക്ക് ഇ.ഡി സമൻസ് നൽകി. കൂടുതൽ വിവരങ്ങളും തെളിവുകളും സമാഹരിച്ച ശേഷം വീണയെ വീണ്ടും ചോദ്യം ചെയ്യലിനായി വിളിപ്പിക്കും. കേസിലെ പ്രഥമ കുറ്റപത്രം വൈകാതെ തന്നെ കോടതിയിൽ സമർപ്പിക്കുമെന്നാണ് അറിയുന്നത്.

മുൻ മുഖ്യമന്ത്രി പിണറായി വിജയൻ ഉൾപ്പെടെയുള്ളവർക്കെതിരെ അഴിമതി നിരോധന നിയമപ്രകാരം എഫ്.ഐ.ആർ ഇടണമെന്ന ആവശ്യത്തിൽ സംസ്ഥാന ഭരണകൂടം സ്വീകരിക്കുന്ന സമീപനത്തിന് ശേഷമായിരിക്കും ഇ.ഡിയുടെ തുടർ നീക്കങ്ങൾ. പിണറായി വിജയനെതിരെയുള്ള ഇ.ഡി റിപ്പോർട്ട് ഡി.ജി.പി റവാഡ ചന്ദ്രശേഖർ ആഭ്യന്തര സെക്രട്ടറിക്ക് കൈമാറിയിട്ടുണ്ട്. ആഭ്യന്തര സെക്രട്ടറി വിശദമായി പരിശോധിച്ച ശേഷമാകും ഇത് ആഭ്യന്തര മന്ത്രിക്ക് നൽകുക. റിപ്പോർട്ട് ലഭ്യമായാൽ ആവശ്യമായ പരിശോധനകൾ നടത്തി മുഖ്യമന്ത്രിയുമായി ആലോചിച്ച് തുടർതീരുമാനമെടുക്കുമെന്ന് ആഭ്യന്തര മന്ത്രി രമേശ് ചെന്നിത്തല കഴിഞ്ഞ ദിവസം വ്യക്തമാക്കിയിരുന്നു. ഇ.ഡി നൽകിയ കണ്ടെത്തലുകൾ പൂർണ്ണമായും തള്ളിക്കളയാനാവില്ലെന്നും കേസ് രജിസ്റ്റർ ചെയ്യുന്ന വിഷയത്തിൽ ആവശ്യമെങ്കിൽ നിയമോപദേശം തേടുമെന്നും അദ്ദേഹം പറഞ്ഞു. സർക്കാരുമായി ചർച്ച നടത്തിയ ശേഷം മാത്രമേ പോലീസ് തലത്തിൽ നടപടികളുണ്ടാകൂ എന്ന് ഡി.ജി.പി റവാഡ ചന്ദ്രശേഖറും അറിയിച്ചിട്ടുണ്ട്. അതേസമയം, ഇ.ഡി സമർപ്പിച്ച റിപ്പോർട്ടിനെ കോൺഗ്രസും ഭരണപക്ഷവും അതീവ ഗൗരവത്തോടെയാണ് കാണുന്നതെന്നും, ഇത്തരമൊരു ശുപാർശ ലഭിച്ചാൽ പോലീസിന് നടപടി സ്വീകരിക്കാതിരിക്കാൻ കഴിയില്ലെന്നും മന്ത്രി സണ്ണി ജോസഫ് പ്രതികരിച്ചു.

ഡി.ജി.പിക്ക് കൈമാറിയ കത്തിൽ മുൻ മുഖ്യമന്ത്രി പിണറായി വിജയൻ, വീണ ടി, മുൻ മന്ത്രിയും എം.എൽ.എയുമായ പി.എ. മുഹമ്മദ് റിയാസ് എന്നിവർക്കെതിരെ അതീവ ഗുരുതരമായ ആരോപണങ്ങളാണ് ഇ.ഡി ഉന്നയിച്ചിട്ടുള്ളത്. മകൾ വീണ വഴി പിണറായി വിജയൻ സി.എം.ആർ.എല്ലിൽ നിന്ന് 3.28 കോടി രൂപ കൈക്കൂലിയായി വാങ്ങിയെന്നാണ് പ്രധാന കണ്ടെത്തൽ. പിണറായി വിജയന് പുറമെ മുഹമ്മദ് റിയാസ്, എക്‌സാലോജിക് എം.ഡി വീണ എന്നിവർക്കെതിരെയും റിപ്പോർട്ടിൽ പരാമർശങ്ങളുണ്ട്. ലഭിച്ച കൈക്കൂലിപ്പണം റിയാസ് വീണ വഴിയും മറ്റ് സുഹൃത്തുക്കൾ വഴിയും ദുബായിലേക്ക് കടത്തിയെന്നാണ് ഇ.ഡി വ്യക്തമാക്കുന്നത്. ഈ പണം വാങ്ങുന്നതിനും വിദേശത്തേക്ക് മാറ്റുന്നതിനും വീണ തന്റെ പിതാവായ പിണറായി വിജയനെയും ഭർത്താവായ റിയാസിനെയും സഹായിച്ചു. ഈ ഇടപാടുകൾക്കായി എക്‌സാലോജിക് കമ്പനിയുടെ വാഹനം ഉപയോഗിച്ചതായും, സി.എം.ആർ.എൽ എം.ഡി കൈക്കൂലി നൽകിയതിനൊപ്പം മുൻ ചീഫ് ഫിനാൻഷ്യൽ ഓഫീസർ പി. സുരേഷ് കുമാർ സാമ്പത്തിക നീക്കങ്ങൾക്ക് സഹായം നൽകിയതായും കത്തിൽ ചൂണ്ടിക്കാട്ടുന്നു. കൂടാതെ, കൈക്കൂലിപ്പണം കൈപ്പറ്റുന്നതിലും കൈമാറുന്നതിലും വീണയെയും റിയാസിനെയും ഷൈജൽ, പി. നിഖിൽ, ഹസ്സൻ വാരിഷ്, ഫൈസാജ് വി.പി, നന്ദുലാൽ എം എന്നിവർ സഹായിച്ചതായും റിപ്പോർട്ടിൽ രേഖപ്പെടുത്തിയിട്ടുണ്ട്.