തിരുവനന്തപുരം: സെക്രട്ടേറിയറ്റിലേക്ക് എസ്.എഫ്.ഐ നടത്തിയ പ്രതിഷേധ മാർച്ചിന് നേരെയുണ്ടായ പോലീസ് ലാത്തിച്ചാർജ്ജിൽ പരിക്കേറ്റ് ചികിത്സയിൽ കഴിയുന്ന വിദ്യാർത്ഥികളെ പ്രതിപക്ഷ നേതാവ് പിണറായി വിജയൻ ആശുപത്രിയിലെത്തി സന്ദർശിച്ചു. എസ്.എഫ്.ഐ സംസ്ഥാന സെക്രട്ടറി പി.എസ്. സഞ്ജീവ് ഉൾപ്പെടെയുള്ള നിരവധി നേതാക്കൾക്കും പ്രവർത്തകർക്കുമാണ് ലാത്തിച്ചാർജ്ജിൽ പരിക്കേറ്റത്. സ്വാഭാവികമായ ജനകീയ സമരങ്ങളെ പോലീസ് രാജ് അഴിച്ചുവിട്ട് അടിച്ചമർത്താനാണ് സംസ്ഥാന സർക്കാർ ശ്രമിക്കുന്നതെന്ന് പിണറായി വിജയൻ ആരോപിച്ചു.
മർദ്ദനമുറകളിൽ കുപ്രസിദ്ധി നേടിയ പോലീസ് ഉദ്യോഗസ്ഥരെ പ്രത്യേകം കണ്ടെത്തി തലസ്ഥാനത്ത് നിയമിക്കുകയും, അവരെ ഉപയോഗിച്ച് വിദ്യാർത്ഥി സമൂഹത്തെ ക്രൂരമായി അക്രമിക്കുകയുമാണ് ഭരണകൂടം ചെയ്യുന്നത്. കുട്ടികളെ ക്രൂരമായി തല്ലിച്ചതയ്ക്കുക മാത്രമല്ല, വധശ്രമം ഉൾപ്പെടെയുള്ള കടുത്ത വകുപ്പുകൾ ചുമത്തി വ്യാപകമായ അറസ്റ്റ് രേഖപ്പെടുത്തുകയുമാണ്. ഇതിനെ ഒരിക്കലും ന്യായീകരിക്കാനാകില്ല. ഈ രീതിയിലാണ് സമരങ്ങളെ നേരിടാനുദ്ദേശിക്കുന്നതെങ്കിൽ പ്രക്ഷോഭങ്ങളെ ഇല്ലാതാക്കാമെന്ന് സർക്കാർ കരുതേണ്ടതില്ലെന്നും പ്രതിപക്ഷ നേതാവ് മുന്നറിയിപ്പ് നൽകി. ഇതിനെതിരെ കടുത്ത ജനരോഷം ഉയർന്നുവരുമെന്നും അത്തരം ഏകാധിപത്യ നടപടികളിൽ നിന്ന് സർക്കാർ പിന്മാറുകയാണ് ഉചിതമെന്നും അദ്ദേഹം ഓർമ്മിപ്പിച്ചു.
പ്രവർത്തകരെ ശരീരമാസകലം തല്ലിച്ചതച്ചതായും ആൺപോലീസുകാർ വിദ്യാർത്ഥിനികളെപ്പോലും അതിക്രൂരമായി തല്ലിയെന്നും അദ്ദേഹം പറഞ്ഞു. മുഖത്തടിയേറ്റ് ചോരയൊലിക്കുന്ന കാഴ്ചയാണുണ്ടായത്; തലയ്ക്കടിയേറ്റ ഒരു പെൺകുട്ടി ബോധരഹിതയായി വീഴുകയുമുണ്ടായി. കേന്ദ്ര സർക്കാർ വിദ്യാർത്ഥി പ്രക്ഷോഭങ്ങളെ ഏത് വിധത്തിലാണ് അടിച്ചമർത്തിയതെന്ന് രാജ്യം കണ്ടതാണ്. അതിന് സമാനമായ രീതിയാണ് ഇപ്പോൾ കേരളത്തിലും നടപ്പിലാക്കുന്നത്. യു.ഡി.എഫ് സർക്കാർ കേന്ദ്രത്തിന്റെ അതേ പാത പിന്തുടരുകയാണെന്നും ഡൽഹിയിൽ പെല്ലറ്റുകളാണ് പ്രയോഗിച്ചതെങ്കിൽ ഇവിടെ മറ്റ് മർദ്ദനമുറകളാണ് സ്വീകരിക്കുന്നതെന്നും അദ്ദേഹം വിമർശിച്ചു. കേരള സർക്കാർ ഈ തെറ്റായ സമീപനം തിരുത്താൻ തയ്യാറാകണം.
വിദ്യാർത്ഥികളെ സമരം ചെയ്യാൻ ആരും ഇളക്കിവിട്ടതല്ലെന്ന് വ്യക്തമാക്കിയ അദ്ദേഹം, വന്ദേമാതരത്തെ പൂർണ്ണമായി അടിച്ചേല്പിക്കുന്ന യു.ഡി.എഫ് സർക്കാരിന്റെ സമീപനത്തെയും വിമർശിച്ചു. കേരള സർവകലാശാലാ വേദിയിലും വന്ദേമാതരം പൂർണ്ണമായി ആലപിച്ചു. ഇത്തരം കാര്യങ്ങളിൽ വിദ്യാർത്ഥികൾ പ്രതികരിക്കണ്ടേ എന്നും അദ്ദേഹം ചോദിച്ചു. യു.ഡി.എഫ് സർക്കാർ ആർ.എസ്.എസ് അനുകൂല സമീപനമാണ് സ്വീകരിക്കുന്നത്. മുൻപ് വന്ദേമാതരത്തിന്റെ രണ്ട് ചരണങ്ങൾ മാത്രം ആലപിച്ചാൽ മതിയെന്ന നിലപാടാണ് ഉണ്ടായിരുന്നത്; എന്നാൽ സർവകലാശാലയിലടക്കം അത് പൂർണ്ണമായി ആലപിക്കുന്ന സ്ഥിതിയാണുള്ളതെന്നും പിണറായി വിജയൻ ചൂണ്ടിക്കാട്ടി.
