തിരുവനന്തപുരം:തെരഞ്ഞെടുപ്പ് പരാജയത്തെത്തുടർന്ന് പിണറായി വിജയൻ നടത്തിയ പരസ്യ പ്രതികരണങ്ങളിൽ സി.പി.ഐ.എം കേന്ദ്ര നേതൃത്വത്തിന് കടുത്ത എതിർപ്പ്. തളിപ്പറമ്പിലും പയ്യന്നൂരിലും സംഘടിപ്പിച്ച രാഷ്ട്രീയ വിശദീകരണ യോഗങ്ങളിൽ തോൽവിയെക്കുറിച്ച് പിണറായി മുന്നോട്ടുവെച്ച ന്യായീകരണങ്ങൾ പാർട്ടി കേന്ദ്ര കമ്മിറ്റി അംഗീകരിച്ച ഔദ്യോഗിക അവലോകന റിപ്പോർട്ടിന് നിരക്കുന്നതല്ലെന്ന വിലയിരുത്തലിലാണ് നേതൃത്വം. ഈ യോഗങ്ങളിൽ അദ്ദേഹം നടത്തിയ ആദ്യഘട്ട പ്രസംഗങ്ങളിൽ കേന്ദ്ര നേതൃത്വത്തിന് കടുത്ത അതൃപ്തിയുണ്ടെന്നാണ് പുറത്തുവരുന്ന വിവരങ്ങൾ. കേന്ദ്ര കമ്മിറ്റിയുടെ പൊതുനിലപാടുകളെ പൂർണ്ണമായി തള്ളിക്കളഞ്ഞ പിണറായി, പരാജയത്തിന്റെ ഉത്തരവാദിത്തം അണികളുടെ മേൽ കെട്ടിവെക്കാനാണ് ശ്രമിച്ചതെന്ന വിമർശനം ശക്തമായിട്ടുണ്ട്.
തോൽവിയുമായി ബന്ധപ്പെട്ട് കേന്ദ്ര കമ്മിറ്റി തയ്യാറാക്കിയ വിലയിരുത്തലുകളെ പിണറായി വിജയൻ പരസ്യമായി ചോദ്യം ചെയ്യുകയാണെന്ന് സി.സി അംഗങ്ങളിൽ ഒരു വിഭാഗം കുറ്റപ്പെടുത്തുന്നു. കേരളത്തിൽ നിന്നുള്ള കേന്ദ്ര കമ്മിറ്റി അംഗങ്ങൾക്കിടയിലും ഈ വിഷയത്തിൽ കടുത്ത ഭിന്നതയുണ്ട്. തെരഞ്ഞെടുപ്പിലുണ്ടായ സംഘടനാപരമായ വീഴ്ചകൾ കേന്ദ്ര കമ്മിറ്റി കൃത്യമായി ചൂണ്ടിക്കാണിച്ചിട്ടും അത് ഉൾക്കൊള്ളാൻ പിണറായി തയ്യാറാകാത്തതിലാണ് ഇവരുടെ പ്രതിഷേധം. പ്രവർത്തകരെ മാത്രം കുറ്റപ്പെടുത്തി സംസാരിക്കുന്നത് കാര്യങ്ങൾ കൂടുതൽ സങ്കീർണ്ണമാക്കുകയാണെന്നും ഇവർ കരുതുന്നു. അതേസമയം, വരാനിരിക്കുന്ന വിശാല സംസ്ഥാന കമ്മിറ്റി യോഗത്തിൽ നേതൃമാറ്റം സംബന്ധിച്ച ചർച്ചകൾ ഉയർന്നുവരുന്നത് തടയാനാണ് പിണറായിയുടെ ഇത്തരം നീക്കങ്ങളെന്നും ഒരു വിഭാഗം രാഷ്ട്രീയ നിരീക്ഷകർ ചൂണ്ടിക്കാണിക്കുന്നു.
തളിപ്പറമ്പിൽ നടന്ന വിശദീകരണ യോഗത്തിലാണ് പിണറായി വിജയൻ അണികളെ രൂക്ഷമായി വിമർശിച്ചത്. പ്രവർത്തകരെ തെറ്റായ ദിശയിലേക്ക് നയിച്ച ഘടകങ്ങൾ എന്തൊക്കെയാണെന്ന് ഗൗരവത്തോടെ ആത്മപരിശോധന നടത്തണമെന്ന് അദ്ദേഹം ആവശ്യപ്പെട്ടിരുന്നു. പരാജയത്തെ ഗൗരവമായാണ് കാണുന്നതെന്നും ആരുടെ വാക്കുകൾ വിശ്വസിച്ചാണ് ഇത്തരമൊരു തീരുമാനമെടുത്തതെന്നും ആരാഞ്ഞ അദ്ദേഹം, സംഭവിച്ച തെറ്റുകൾ ഇനിയെങ്കിലും തിരുത്താൻ അണികൾ തയ്യാറാകണമെന്നും പ്രസംഗത്തിൽ വ്യക്തമാക്കിയിരുന്നു.
