കണ്ണൂർ:പയ്യന്നൂർ എം.എൽ.എയുടെ ആരോപണങ്ങൾക്ക് ശക്തമായ മറുപടിയുമായി സി.പി.ഐ.എം നേതാവ് ടി.ഐ. മധുസൂദനൻ. പിണറായി വിജയൻ നടത്തിയ പ്രസംഗത്തിൽ എവിടെയാണ് ഭീഷണി അടങ്ങിയിരിക്കുന്നതെന്ന് ചോദിച്ചുകൊണ്ടാണ് അദ്ദേഹം നിലപാട് വ്യക്തമാക്കിയത്. സി.പി.ഐ.എം ഭീഷണിപ്പെടുത്തുകയാണെന്ന രീതിയിൽ പയ്യന്നൂർ എം.എൽ.എ തെറ്റായ പ്രചാരണം നടത്തുകയാണെന്ന് അദ്ദേഹം കുറ്റപ്പെടുത്തി. തെറ്റുകൾ കണ്ടാൽ അത് തിരുത്തി മുന്നോട്ടുപോകുക എന്നതാണ് പാർട്ടിയുടെ പ്രവർത്തനരീതിയെന്നും, പിണറായി വിജയനെ കാണുമ്പോൾ ഭയം തോന്നുന്നുവെങ്കിൽ അതിന് തങ്ങൾ ഉത്തരവാദികളല്ലെന്നും അദ്ദേഹം വ്യക്തമാക്കി. പിണറായി വിജയന്റെ പ്രസംഗത്തിലെ പ്രധാന ഭാഗങ്ങൾ വായിച്ചുകേൾപ്പിച്ചാണ് മധുസൂദനൻ വാർത്താസമ്മേളനം നടത്തിയത്. പ്രസംഗത്തിലെ ഓരോ പരാമർശങ്ങളും വിശദീകരിച്ച അദ്ദേഹം, ഇതിൽ ഭീഷണിയുടെ സ്വഭാവമുള്ള എന്തെങ്കിലും ഉണ്ടോയെന്ന് ചോദിക്കുകയും ചെയ്തു.