തിരുവനന്തപുരം: മുഖ്യമന്ത്രിയുടെ വാഹനവ്യൂഹം തടഞ്ഞെന്ന കേസിൽ പോലീസ് പിടിയിലായ മുൻ ഡി.സി.സി ഭാരവാഹി ചേന്തി അനിലിന് ശക്തമായ പിന്തുണയുമായി മുതിർന്ന കോൺഗ്രസ് നേതാവ് എൻ. പീതാംബരക്കുറുപ്പ്. ചേന്തിയിൽ വെച്ച് മുഖ്യമന്ത്രി വി.ഡി. സതീശനെ ആരും തടഞ്ഞിട്ടില്ലെന്ന് അദ്ദേഹം വ്യക്തമാക്കി. അത്തരമൊരു നീക്കത്തെക്കുറിച്ച് ആരും ചിന്തിച്ചിട്ടുപോലുമില്ലെന്നും, അവിടെ തടിച്ചുകൂടിയവർ മുഖ്യമന്ത്രിക്ക് സ്വീകരണം നൽകാൻ എത്തിയവരായിരുന്നുവെന്നും അദ്ദേഹം പറഞ്ഞു. അനിൽ ഒരു ഗുണ്ടയായി മാറിയിട്ടുണ്ടെങ്കിൽ അത് കോൺഗ്രസ് പാർട്ടിയുടെ പതാക വാനോളമുയർത്താൻ വേണ്ടി മാത്രമാണെന്നും പീതാംബരക്കുറുപ്പ് റിപ്പോർട്ടർ ടിവിയോട് പ്രതികരിച്ചു.
പോലീസിന്റെ നടപടികൾക്കെതിരെയും അദ്ദേഹം രൂക്ഷമായ വിമർശനം ഉന്നയിച്ചു. മുഖ്യമന്ത്രിയെ തടഞ്ഞുവെന്ന വാദം പോലീസിന്റെ വെറും കെട്ടുകഥകൾ മാത്രമാണ്. ചേന്തി അനിൽ ഗുണ്ടയാണെന്ന് സർട്ടിഫിക്കറ്റ് നൽകേണ്ട ബാധ്യത പോലീസിനില്ല. അനിലിനെ തനിക്ക് വർഷങ്ങളായി അറിയാമെന്നും അയാൾ ചാരായക്കച്ചവടം നടത്തുന്ന ആളല്ലെന്നും അദ്ദേഹം വ്യക്തമാക്കി. കോടതി നിർവഹിക്കേണ്ട ചുമതലകൾ പോലീസ് ഏറ്റെടുക്കേണ്ടതില്ല. അന്ന് അവിടെ ഒത്തുകൂടിയവരിൽ ഭൂരിഭാഗവും കോൺഗ്രസ് പ്രവർത്തകരായിരുന്നു. ആരുടെയും കൈകളിൽ ആയുധങ്ങളുണ്ടായിരുന്നില്ല. വാഹനവ്യൂഹം തടസ്സപ്പെടുത്താൻ ലക്ഷ്യമിട്ടിരുന്നെങ്കിൽ റോഡിൽ കല്ലും പൈപ്പുമൊക്കെ നിരത്തിവെച്ചാൽ മതിയായിരുന്നു. വഴി തടയാൻ സാധ്യതയുണ്ടെന്ന വിവരം പോലീസിന് മുൻകൂട്ടി ലഭിച്ചിരുന്നെങ്കിൽ വാഹനങ്ങളുടെ യാത്രാവഴി മാറ്റേണ്ട ചുമതല പോലീസിനുണ്ടായിരുന്നു. പോലീസിന്റെ പ്രകടനങ്ങളെക്കുറിച്ച് താൻ കൂടുതൽ പ്രതികരിക്കുന്നില്ല. മുഖ്യമന്ത്രിക്ക് സംഭവത്തെക്കുറിച്ച് ആരെങ്കിലും തെറ്റായ വിവരങ്ങൾ നൽകിയിട്ടുണ്ടാകാമെന്നും, അനിൽ ചെയ്തതിൽ എന്തെങ്കിലും തെറ്റുണ്ടെങ്കിൽ മുഖ്യമന്ത്രി ക്ഷമിക്കുമെന്നാണ് തന്റെ പ്രതീക്ഷയെന്നും പീതാംബരക്കുറുപ്പ് കൂട്ടിച്ചേർത്തു.
