തിരുവനന്തപുരം: കേരള സർവ്വകലാശാലയിൽ സംഘടിപ്പിച്ച ദേശീയ കായികദിനാഘോഷ ചടങ്ങിൽ വന്ദേമാതരം പൂർണ്ണമായി ആലപിച്ചു. ഗവർണർ മുഖ്യാതിഥിയായി എത്തിയ വേദിയിലായിരുന്നു വന്ദേമാതരത്തിന്റെ സമ്പൂർണ്ണ ആലാപനം നടന്നത്. സംസ്ഥാന മന്ത്രിമാരായ റോജി എം. ജോൺ, ഒ.ജെ. ജനീഷ് എന്നിവരും ഗവർണർക്കൊപ്പം വേദിയിലുണ്ടായിരുന്നു. കേരള സർവ്വകലാശാല വൈസ് ചാൻസലർ ഡോ. മോഹനൻ കുന്നുമ്മലിന്റെ നേതൃത്വത്തിലായിരുന്നു പരിപാടി നടത്തിയത്. ഗവർണർ സാന്നിധ്യമറിയിക്കുന്ന ഔദ്യോഗിക ചടങ്ങുകളിലെല്ലാം വന്ദേമാതരം പൂർണ്ണരൂപത്തിൽ തന്നെ ആലപിക്കണമെന്ന കേന്ദ്രസർക്കാർ നിർദ്ദേശത്തിന്റെ അടിസ്ഥാനത്തിലായിരുന്നു ഈ നടപടി.
കഴിഞ്ഞ ദിവസം ഉപരാഷ്ട്രപതി പങ്കെടുത്ത വിവിധ പൊതുചടങ്ങുകളിലും വന്ദേമാതരം ഇത്തരത്തിൽ പൂർണ്ണമായി ആലപിച്ചിരുന്നു. കേന്ദ്ര സർക്കാരിന്റെ ഔദ്യോഗിക പ്രോട്ടോക്കോൾ കർശനമായി പാലിച്ചുകൊണ്ടാണ് വന്ദേമാതരം ആലപിച്ചതെന്നായിരുന്നു അന്ന് അധികൃതർ നൽകിയ വിശദീകരണം.
