തിരുവനന്തപുരം: റിസർവ് ബാങ്ക് ഓഫ് ഇന്ത്യയിലെ (ആർ.ബി.ഐ) യന്ത്രത്തിൽ കൈ കുടുങ്ങി ഉദ്യോഗസ്ഥന് ദാരുണ അന്ത്യം. ബെംഗളൂരു സ്വദേശിയായ അശോക് (48) ആണ് അപകടത്തിൽ മരണപ്പെട്ടത്. തിരുവനന്തപുരം ബേക്കറി ജംഗ്ഷനിൽ സ്ഥിതിചെയ്യുന്ന റിസർവ് ബാങ്ക് ഓഫീസിൽ ഇന്നലെയായിരുന്നു ദുരന്തം സംഭവിച്ചത്. ആർ.ബി.ഐക്കായി കരാർ വ്യവസ്ഥയിൽ പ്രവർത്തിക്കുന്ന സ്ഥാപനത്തിലെ ഉദ്യോഗസ്ഥനാണ് ഇദ്ദേഹം.
ഉപയോഗശൂന്യമായ കറൻസി നോട്ടുകൾ നശിപ്പിക്കുന്നതിനുള്ള യന്ത്രം ഘടിപ്പിച്ച ശേഷം പരീക്ഷണ ഓട്ടം (ട്രയൽ റൺ) നടത്തുന്നതിനിടെയാണ് മെഷീന്റെ ബൽറ്റിലേക്ക് കൈ കുടുങ്ങിയത്. തുടർന്ന് ശരീരത്തിന്റെ ഒരു ഭാഗം യന്ത്രത്തിനും ബൽറ്റിനുമിടയിൽ പെട്ട് ഇദ്ദേഹത്തിന് സാരമായി പരിക്കേൽക്കുകയായിരുന്നു. അപകടമുണ്ടായ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല.
