തിരുവനന്തപുരം: കണ്ണൂരിൽ ഹെൽത്ത് ഇൻസ്പെക്ടർ ജീവനൊടുക്കിയ സംഭവത്തിൽ മുഖ്യമന്ത്രി വി.ഡി. സതീശനെതിരെയുള്ള വിമർശനങ്ങൾ കടുപ്പിച്ച് മുൻ മന്ത്രിയും എം.എൽ.എയുമായ പി.എ. മുഹമ്മദ് റിയാസ്. ഹെൽത്ത് ഇൻസ്പെക്ടറുടെ അന്ത്യം ഒഴിവാക്കാമായിരുന്ന ഒന്നായിരുന്നുവെന്ന് റിയാസ് പ്രസ്താവിച്ചു. രാഷ്ട്രീയ പകപോക്കലിന്റെ ഭാഗമായാണ് ഇവരെ സ്ഥലംമാറ്റിയതെന്നും ഇതൊരു ഒറ്റപ്പെട്ട സംഭവമല്ലെന്നും അദ്ദേഹം ചൂണ്ടിക്കാട്ടി.
"വളരെ ഗൗരവമർഹിക്കുന്ന ഒരു വിഷയമാണിത്. എല്ലാവരും തയാറായിരുന്നോളൂ, സ്ഥലംമാറ്റങ്ങൾ വരുമെന്ന് ഏതാനും ദിവസങ്ങൾക്ക് മുൻപാണ് മുഖ്യമന്ത്രി മുന്നറിയിപ്പ് നൽകിയത്. മുഖ്യമന്ത്രിയുടെ ഈ വാചകങ്ങളാണ് ദീപലേഖയെ ദൂരസ്ഥലത്തേക്ക് മാറ്റാൻ വഴിവെച്ചത്. ഭരണകൂടം നേരിട്ട് നടപ്പിലാക്കിയ കൊലപാതകമാണിത്. യാതൊരുവിധ മാനദണ്ഡങ്ങളുമില്ലാതെ നടത്തിയ ട്രാൻസ്ഫറുകളുടെ രക്തസാക്ഷിയാണ് ദീപലേഖ" എന്ന് റിയാസ് ആരോപിച്ചു.
ഭരണകൂടത്തെ വിമർശിക്കുന്നവരെ ആക്രമിക്കുന്ന രീതിയാണ് നിലവിലുള്ളതെന്നും, തനിക്കെതിരെ ശബ്ദമുയർത്തുന്നവരെ വേണ്ടെന്ന സമീപനമാണ് മുഖ്യമന്ത്രിയുടേതെന്നും റിയാസ് കൂട്ടിച്ചേർത്തു. ഈ പോരായ്മകൾ തിരുത്താൻ ബന്ധപ്പെട്ടവർ മുൻകൈയെടുക്കണമെന്ന് അദ്ദേഹം ആഹ്വാനം ചെയ്തു. പത്രസ്വാതന്ത്ര്യം തച്ചുടയ്ക്കപ്പെടുകയാണ്. പോസ്റ്റുകൾ പിൻവലിക്കുന്നത് ഭീരുത്വം കൊണ്ടാണ്. വിമർശനങ്ങളോട് അസഹിഷ്ണുത പുലർത്തുന്ന രീതിയാണ് മുഖ്യമന്ത്രി കാണിക്കുന്നതെന്നും അദ്ദേഹം വിമർശിച്ചു.
"നരേന്ദ്ര മോദിയുടെ അതേ പാത തന്നെയാണ് വി.ഡി. സതീശനും പിന്തുടരുന്നത്. തൂഫാൻ വിഷയത്തിൽ ഭരണകൂടത്തിന് രണ്ടുതരത്തിലുള്ള നിലപാടാണോ ഉള്ളത്? മാധ്യമങ്ങൾക്ക് നേരെ ആക്രമണം നടത്തുകയാണ് സർക്കാർ ചെയ്യുന്നത്. പഴുത്ത ഇല കൊഴിയുമ്പോൾ പച്ചയില ചിരിക്കേണ്ടതില്ല, കാരണം എന്നെങ്കിലും ആ പച്ചയിലയും കൊഴിഞ്ഞുവീഴും" എന്ന് മുഹമ്മദ് റിയാസ് പറഞ്ഞു.
