തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വസതിയിൽ പരിശോധന നടത്താനെത്തിയ ഇ.ഡി ഉദ്യോഗസ്ഥരെ മർദ്ദിച്ച കേസിൽ അന്വേഷണസംഘത്തെ പുനഃസംഘടിപ്പിച്ചു. കേസിലെ ഗൂഢാലോചനയും മറ്റ് ഗുരുതര വശങ്ങളും പരിഗണിച്ചാണ് ഈ തീരുമാനം. മുൻപുണ്ടായിരുന്ന മുപ്പതംഗ സംഘത്തെ ചുരുക്കി പതിനാല് പേർ അടങ്ങുന്ന അന്വേഷണ സംഘമാക്കി പുനഃക്രമീകരിക്കുകയായിരുന്നു. ഇതിനിടെ നടന്ന ജനറൽ ട്രാൻസ്ഫറിന്റെ ഭാഗമായി മുൻ സംഘത്തിലുണ്ടായിരുന്ന 4 പേരെ നീക്കുകയും പകരം 4 പുതിയ ഉദ്യോഗസ്ഥരെ സംഘത്തിലേക്ക് ഉൾപ്പെടുത്തുകയും ചെയ്തു.
കേസുമായി ബന്ധപ്പെട്ട് സി.പി.ഐ.എം മുതിർന്ന നേതാക്കളെ ചോദ്യം ചെയ്യാനുള്ള നടപടികളിലേക്ക് അന്വേഷണസംഘം കടക്കുകയാണ്. സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ, തിരുവനന്തപുരം ജില്ലാ സെക്രട്ടറി വി. ജോയ്, മുൻ മന്ത്രി വി. ശിവൻകുട്ടി എന്നിവർക്ക് വരും ആഴ്ചയിൽ ചോദ്യം ചെയ്യലിന് ഹാജരാകാൻ നോട്ടീസ് കൈമാറും. ഇ.ഡി ഉദ്യോഗസ്ഥർക്ക് നേരെയുണ്ടായ ആക്രമണത്തിൽ ഗൂഢാലോചനയോ കൃത്യമായ ആസൂത്രണമോ പ്രേരണയോ നടന്നിട്ടുണ്ടോ എന്നാണ് പ്രത്യേക അന്വേഷണസംഘം പരിശോധിക്കുന്നത്. സി.പി.ഐ.എം നേതാക്കളുടെ ഫോൺ സന്ദേശങ്ങളും കോളുകളും സൈബർ ഫോറൻസിക് പരിശോധനയ്ക്ക് വിധേയമാക്കുമെന്നും, അക്രമത്തിന് മുൻപും സംഭവസമയത്തും നടന്ന ആശയവിനിമയങ്ങൾ സൂക്ഷ്മമായി പരിശോധിച്ച് വരികയാണെന്നും ഉദ്യോഗസ്ഥർ ഉറപ്പിച്ചുപറയുന്നു. കേസിൽ ഇതുവരെ 26 പേർ അറസ്റ്റിലായിട്ടുണ്ടെന്നും കൂടുതൽ പ്രതികളെ ഇനി അറസ്റ്റ് ചെയ്യാനുണ്ടെന്നും പൊലീസ് വ്യക്തമാക്കി.
