മുംബൈ: നവി മുംബൈയിൽ വാഹന പരിശോധനയ്ക്കിടെ പൊലീസ് ഉദ്യോഗസ്ഥനെ കാറിടിച്ച് കൊലപ്പെടുത്താൻ ശ്രമം. അമിതവേഗതയിൽ എത്തിയ സ്വിഫ്റ്റ് ഡിസയർ കാറിന്റെ ബോണറ്റിൽ വീണ പൊലീസ് കോൺസ്റ്റബിൾ ദിലീപ് ഭോയിയെ ഏകദേശം 200 മീറ്ററോളം വലിച്ചിഴച്ച ശേഷം താഴെയിട്ടതിനെ തുടർന്ന് അദ്ദേഹത്തിന് ഗുരുതരമായി പരിക്കേറ്റു.
ചെക്ക് പോയിന്റിൽ ഡ്യൂട്ടിയിലുണ്ടായിരുന്ന ഉദ്യോഗസ്ഥർ കാർ തടഞ്ഞുനിർത്തി ഡ്രൈവറെ ചോദ്യം ചെയ്യുന്നതിനിടെയായിരുന്നു ആക്രമണം. സംഭാഷണത്തിനിടെ ഡ്രൈവർ കാർ പെട്ടെന്ന് മുന്നോട്ടെടുത്ത് ഭോയിയെ ഇടിക്കുകയായിരുന്നു; ബോണറ്റിലേക്ക് തെറിച്ചുവീണ് വിൻഡ്‌സ്ക്രീനിൽ പിടിച്ചുകിടന്ന ഉദ്യോഗസ്ഥനുമായി കാർ 200 മീറ്ററോളം പാഞ്ഞ ശേഷം അദ്ദേഹം റോഡിലേക്ക് വീണു.
സംഭവത്തിന്റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. അപകടത്തിന് ശേഷം നിർത്താതെ ഓടിച്ചുപോയ വ്യാജ രജിസ്ട്രേഷൻ നമ്പറിലുള്ള കാർ പൊലീസ് പിന്നീട് കണ്ടെത്തിയിട്ടുണ്ട്; സിസിടിവി ദൃശ്യങ്ങൾ കേന്ദ്രീകരിച്ച് ഡ്രൈവറെ പിടികൂടാനുള്ള അന്വേഷണം പൊലീസ് ഊർജ്ജിതമാക്കി.
