കൊൽക്കത്ത: കൊൽക്കത്ത വിമാനത്താവളത്തിൽ നിന്ന് മുംബൈയിലേക്ക് പുറപ്പെടാനിരുന്ന എയർ ഇന്ത്യ വിമാനത്തിന് നേരെ വ്യാജ ഹൈജാക്ക് ഭീഷണി. വിമാനത്തിലെ ശുചിമുറിയിലെ കണ്ണാടിയിൽ ഭീഷണി സന്ദേശം എഴുതിവെച്ച നിലയിൽ കണ്ടെത്തിയതിനെ തുടർന്ന് രാവിലെ 10.30-ന് പുറപ്പെടേണ്ടിയിരുന്ന സർവീസ് വൈകിട്ട് അഞ്ച് മണിക്കാണ് യാത്ര തിരിച്ചത്.
സന്ദേശം ശ്രദ്ധയിൽപ്പെട്ട ഉടൻ തന്നെ ജീവനക്കാർ എയർ ട്രാഫിക് കൺട്രോളിനെ (എടിസി) വിവരമറിയിക്കുകയും വിമാനം പ്രത്യേക സുരക്ഷാ മേഖലയിലേക്ക് മാറ്റുകയും ചെയ്തു. തുടർന്ന് സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സും (സിഐഎസ്എഫ്) പ്രത്യേക സുരക്ഷാ ഉദ്യോഗസ്ഥരും ചേർന്ന് വിമാനത്തിന്റെ എല്ലാ ഭാഗങ്ങളിലും ലഗേജ് അറകളിലും വിശദമായ പരിശോധന നടത്തിയ ശേഷമാണ് ഭീഷണി വ്യാജമാണെന്ന് സ്ഥിരീകരിച്ചത്.
ഭീഷണി സന്ദേശം എഴുതിയ വ്യക്തിയെ കണ്ടെത്താൻ അധികൃതർ അന്വേഷണം ആരംഭിച്ചിട്ടുണ്ട്; ഒരേ ദിവസം തന്നെ കൊൽക്കത്ത വിമാനത്താവളത്തിൽ രണ്ട് സുരക്ഷാ സംഭവങ്ങൾ റിപ്പോർട്ട് ചെയ്തത് ആശങ്കയ്ക്ക് ഇടയാക്കി.
