കാഠ്മണ്ഡു: നേപ്പാളിലെ എവറസ്റ്റ് ബേസ് ക്യാമ്പിന് സമീപം ഫെറിഷെ ഹെലിപാഡിൽ ലാൻഡിങ്ങിനിടെ രണ്ട് ഹെലികോപ്റ്ററുകൾ തമ്മിൽ കൂട്ടിയിടിച്ച് ഇന്ത്യൻ വിനോദസഞ്ചാരി കൊല്ലപ്പെട്ടു. ചെന്നൈ സ്വദേശിയായ വസന്തകുമാറാണ് അപകടത്തിൽ മരിച്ചത്. ഇന്ന് രാവിലെ 8:11-ഓടെയുണ്ടായ അപകടത്തിൽ മറ്റൊരാൾക്ക് പരിക്കേറ്റതായും ഇയാളെ എയർലിഫ്റ്റ് ചെയ്ത് കാഠ്മണ്ഡുവിലെ മെഡിസിറ്റി ആശുപത്രിയിൽ പ്രവേശിപ്പിച്ചതായും അധികൃതർ അറിയിച്ചു.
'ഫിഷ് ടെയിൽ എയർ', 'ഡൈനാസ്റ്റി എയർ' എന്നീ കമ്പനികളുടെ സർവീസുകളാണ് അപകടത്തിൽപ്പെട്ടതെന്ന് സോളുഖുംബു പോലീസ് മേധാവി മൗസം തമാങ് വ്യക്തമാക്കി.
രണ്ട് ഹെലികോപ്റ്ററുകളിലുമായി ആകെ എത്രപേർ സഞ്ചരിച്ചിരുന്നു എന്നതിൽ ഔദ്യോഗിക സ്ഥിരീകരണം വന്നിട്ടില്ല; അപകടകാരണത്തെക്കുറിച്ചും കൂടുതൽ വിവരങ്ങളെക്കുറിച്ചും അധികൃതർ അന്വേഷണം നടത്തിവരികയാണ്.
