ന്യൂഡൽഹി: പ്രധാനമന്ത്രി നരേന്ദ്ര മോദി പദവിയിലെത്തിയതും ആ സ്ഥാനത്ത് തുടരുന്നതും വിദേശ സഹായത്തിന്റെ പിൻബലത്തിലാണെന്നും രാജ്യത്തോട് കള്ളം പറയുന്നത് അവസാനിപ്പിക്കണമെന്നും ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. വിദേശ ഉടമസ്ഥതയിലുള്ള സമൂഹമാധ്യമങ്ങൾ മോദിക്ക് വലിയ പിന്തുണ നൽകുന്നുണ്ടെന്നും അദ്ദേഹത്തിന്റെ സാമ്പത്തിക അടിത്തറ പൂർണ്ണമായും നിയന്ത്രിക്കുന്നത് വിദേശ ശക്തികളാണെന്നും ആരോപിച്ച രാഹുൽ, വിഷയത്തിൽ ഏതുവേദിയിലും എപ്പോൾ വേണമെങ്കിലും നേർക്കുനേർ സംവാദത്തിന് തയ്യാറാണെന്ന് പ്രധാനമന്ത്രിയെ എക്സിലൂടെ വെല്ലുവിളിച്ചു.
പ്രതിപക്ഷ പാർട്ടികൾ വിദേശ സഹായത്തോടെ ഇന്ത്യയെ അസ്ഥിരപ്പെടുത്താൻ ശ്രമിക്കുകയാണെന്നും വികസനപ്രവർത്തനങ്ങൾ തടസ്സപ്പെടുത്തി നുണകളും അഭ്യൂഹങ്ങളും പ്രചരിപ്പിക്കുകയാണെന്നുമുള്ള നരേന്ദ്ര മോദിയുടെ വിമർശനങ്ങൾക്ക് മറുപടിയായാണ് രാഹുൽ ഗാന്ധിയുടെ പ്രതികരണം.
ധൈര്യമുണ്ടെങ്കിൽ സംവാദത്തിന് വരാൻ വെല്ലുവിളിച്ച രാഹുൽ, മോദിയെക്കുറിച്ചുള്ള തന്റെ അറിവുകൾ പ്രധാനമന്ത്രിയെ ഭയപ്പെടുത്തുന്നതിനാലാണ് അദ്ദേഹം ഇതിന് തയ്യാറാകാത്തതെന്നും കുറിപ്പിൽ കൂട്ടിച്ചേർത്തു.
