ന്യൂഡൽഹി: ഇന്ത്യ തദ്ദേശീയമായി രൂപകൽപ്പന ചെയ്ത പ്രഥമ ബുള്ളറ്റ് ട്രെയിനിന്റെ നിർമ്മാണം ബെംഗളൂരുവിലെ ഭാരത് എർത്ത് മൂവേഴ്സ് ലിമിറ്റഡ് (ബിഇഎംഎൽ) പ്ലാന്റിൽ പുരോഗമിക്കുന്നു. മുംബൈ-അഹമ്മദാബാദ് ഹൈസ്പീഡ് റെയിൽ ഇടനാഴിയിലൂടെയാകും പൂർണ്ണമായും ഇന്ത്യൻ എൻജിനീയറിങ് മികവിൽ നിർമ്മിക്കുന്ന ഈ അതിവേഗ ട്രെയിൻ സർവീസ് നടത്തുക. സുരക്ഷയ്ക്കും ഉയർന്ന വേഗതയ്ക്കും മുൻഗണന നൽകുന്ന ട്രെയിൻ പരീക്ഷണയോട്ടത്തിൽ മണിക്കൂറിൽ 280 കിലോമീറ്റർ വേഗത കൈവരിക്കുമെങ്കിലും, യാത്രാ സർവീസുകൾ പരമാവധി 249 കി.മീ വേഗതയിലാകും ആസൂത്രണം ചെയ്യുക.
ഏകദേശം 202 മീറ്റർ നീളമുള്ള ട്രെയിൻ എട്ട് കോച്ചുകൾ ഉൾപ്പെടുന്നതാണ്; ഇതിൽ നാല് മോട്ടോർ കാറുകളും നാല് ട്രെയിലർ കാറുകളുമുണ്ട്. ഒരേസമയം 557 യാത്രക്കാരെ ഉൾക്കൊള്ളാൻ ശേഷിയുള്ള ട്രെയിനിൽ ഏഴ് സ്റ്റാൻഡേർഡ് ക്ലാസ് കോച്ചുകളും (3x2 സീറ്റിങ്) ഒരു എക്സിക്യൂട്ടീവ് ക്ലാസ് കോച്ചും (2x2 സീറ്റിങ്) ഉൾപ്പെടും. ഭിന്നശേഷിക്കാർക്കും ചലനപരിമിതിയുള്ളവർക്കുമായി രണ്ട് പ്രത്യേക ഇടങ്ങളും കോച്ചുകളിൽ ക്രമീകരിച്ചിട്ടുണ്ട്.
ട്രെയിനിന്റെ ഇരുവശങ്ങളിലും ഡ്രൈവർ ക്യാബിനുകളും പ്രവർത്തനങ്ങൾ ഏകോപിപ്പിക്കാൻ അത്യാധുനിക ഇന്റലിജന്റ് ഓൺബോർഡ് കൺട്രോൾ സംവിധാനവും ലഭ്യമാണ്; ഇതുവഴി ഓപ്പറേഷൻസ് കൺട്രോൾ സെന്ററുമായി ഡ്രൈവർമാർക്ക് നേരിട്ട് ആശയവിനിമയം നടത്താം. തിരക്ക് വർദ്ധിക്കുന്ന സാഹചര്യങ്ങളിൽ എട്ട് കോച്ചുകളുള്ള രണ്ട് ട്രെയിനുകൾ പരസ്പരം കൂട്ടിച്ചേർത്ത് 16 കോച്ചുകളുള്ള ട്രെയിനായി സർവീസ് നടത്താനുള്ള സാങ്കേതിക സൗകര്യവും ഈ റാക്കുകളിലുണ്ട്.
