മുംബൈ: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് മുംബൈയിൽ നടന്ന രാഷ്ട്രീയ സമരത്തിൽ പങ്കെടുത്ത സംഭവത്തിൽ നടൻ ഇമ്രാൻ ഖാൻ ബോംബെ ഹൈക്കോടതിയിൽ സമർപ്പിച്ച സത്യവാങ്മൂലത്തിലൂടെ നിരുപാധികം മാപ്പ് പറഞ്ഞു. അതേസമയം, ഒക്ടോബർ 28-നകം രാജ്യം വിടണമെന്ന് ആവശ്യപ്പെട്ട് മുംബൈ പോലീസ് നൽകിയ നോട്ടീസിനെതിരെ നടൻ സമർപ്പിച്ച ഹർജി പരിഗണിച്ച കോടതി, ഇമ്രാൻ ഖാന് ഇന്ത്യയിൽ തുടരാനുള്ള അനുമതി ഡിസംബർ ഏഴ് വരെ നീട്ടിനൽകി.
ഒക്ടോബർ 10-ന് മുംബൈ ആഗസ്റ്റ് ക്രാന്തി മൈതാനിയിൽ വെച്ച് നടന്ന പ്രതിഷേധത്തിൽ പങ്കെടുത്തതിനാണ് മുംബൈ പോലീസ് നടനെതിരെ നാടുകടത്തൽ നോട്ടീസ് പുറപ്പെടുവിച്ചത്. യുഎസ് പൗരത്വവും ഓവർസീസ് സിറ്റിസൺ ഓഫ് ഇന്ത്യ (ഒസിഐ) കാർഡുമുള്ള ഒരാൾക്ക് ഇന്ത്യൻ പൗരനെപ്പോലെ പ്രതിഷേധങ്ങളിൽ പങ്കുചേരാൻ കഴിയില്ലെന്ന് ജസ്റ്റിസുമാർ ചൂണ്ടിക്കാട്ടി. ഒരു ഇന്ത്യൻ പൗരൻ യുഎസിൽ ഇത്തരമൊരു പ്രക്ഷോഭം നടത്തിയാൽ അടുത്ത വിമാനത്തിൽ തന്നെ തിരിച്ചയക്കില്ലേയെന്നും, ഇത്രയും കാലം ഒരു സമരത്തിലും പങ്കെടുക്കാത്തയാൾ ഇപ്പോൾ പങ്കെടുത്തത് എന്തിനാണെന്നും ഹൈക്കോടതി വിമർശിച്ചു.
42-കാരനായ ഇമ്രാൻ ഖാൻ ജീവിതത്തിന്റെ ഭൂരിഭാഗവും ഇന്ത്യയിലാണ് കഴിഞ്ഞതെന്നും യുഎസിൽ ജനിച്ചതുകൊണ്ടു മാത്രമാണ് അവിടുത്തെ പൗരത്വം ലഭിച്ചതെന്നും നടന്റെ അഭിഭാഷകൻ വെങ്കിടേഷ് ധോൻഡ് വാദിച്ചു. എന്നാൽ, ഇത്രയധികം കാലം ഇവിടെ താമസിച്ചിട്ടും എന്തുകൊണ്ട് ഇന്ത്യൻ പൗരത്വത്തിന് അപേക്ഷിച്ചില്ലെന്ന് ചോദിച്ച കോടതി, അദ്ദേഹം ഇന്ത്യൻ പൗരനല്ലെന്ന വസ്തുത ആവർത്തിച്ചു വ്യക്തമാക്കി.
