ലഖ്‌നൗ: ഉത്തർപ്രദേശ് ലെജിസ്ലേറ്റീവ് കൗൺസിലിലേക്ക് (എംഎൽസി) നടന്ന തിരഞ്ഞെടുപ്പിൽ പ്രധാനമന്ത്രി നരേന്ദ്ര മോദിയുടെ ലോക്‌സഭാ മണ്ഡലമായ വാരാണസിയിൽ അഖിലേഷ് യാദവിന്റെ സമാജ്‌വാദി പാർട്ടിക്ക് നിർണ്ണായക വിജയം. വാരാണസി അധ്യാപക മണ്ഡലം എസ്പി നിലനിർത്തിയപ്പോൾ, വാരാണസി ബിരുദധാരികളുടെ മണ്ഡലത്തിലും പാർട്ടി വ്യക്തമായ വിജയത്തിലേക്ക് നീങ്ങുകയാണ്. കൂടാതെ ആഗ്ര ടീച്ചേഴ്‌സ് മണ്ഡലത്തിലും സമാജ്‌വാദി പാർട്ടി വിജയം ഉറപ്പിച്ചു.
ആകെ 11 കൗൺസിൽ സീറ്റുകളിലേക്ക് നടന്ന തെരഞ്ഞെടുപ്പിൽ അഞ്ച് സീറ്റുകളിൽ ജയിക്കുകയും ഒന്നിൽ ലീഡ് നേടുകയും ചെയ്ത ബിജെപിക്കാണ് മൊത്തത്തിൽ മുൻതൂക്കം. ലഖ്‌നൗ ടീച്ചേഴ്‌സ്, മീററ്റ്-സഹാറൻപൂർ ടീച്ചേഴ്‌സ്, ബറേലി-മൊറാദാബാദ് ടീച്ചേഴ്‌സ്, മീററ്റ്-സഹാറൻപൂർ ഗ്രാജ്വേറ്റ്‌സ് എന്നിവയും മറ്റൊരു സീറ്റും ബിജെപി സ്വന്തമാക്കി. 2027-ലെ നിയമസഭാ തെരഞ്ഞെടുപ്പിന് മുന്നോടിയായുള്ള നിർണായക രാഷ്ട്രീയ സൂചകമായാണ് ഈ ഫലങ്ങൾ വിലയിരുത്തപ്പെടുന്നത്.
നിയമസഭയും ലെജിസ്ലേറ്റീവ് കൗൺസിലുമുള്ള സംസ്ഥാനങ്ങളിലാണ് ബിരുദധാരികൾക്കും അധ്യാപകർക്കുമായി പ്രത്യേക മണ്ഡലങ്ങൾ പ്രവർത്തിക്കുന്നത്. ഭരണഘടന രൂപീകരണ വേളയിൽ ജാതി, മതം, പണം, കായികശേഷി എന്നിവയുടെ സ്വാധീനം കുറയ്ക്കാൻ വിദ്യാസമ്പന്നരായ പ്രതിനിധികൾ കൗൺസിലിൽ ഉണ്ടാകണമെന്ന കാഴ്ചപ്പാടിലാണ് ഈ സംവിധാനം ഉൾപ്പെടുത്തിയത്. പൊതുജനങ്ങൾക്ക് വോട്ടവകാശമില്ലാത്ത ഈ സീറ്റുകളിൽ രജിസ്റ്റർ ചെയ്ത ബിരുദധാരികൾക്കും അധ്യാപകർക്കും മാത്രമാണ് മുൻഗണനാ വോട്ടിംഗ് രീതിയിലൂടെ സമ്മതിദാനാവകാശം വിനിയോഗിക്കാനാകുക.
