ചെന്നൈ: തമിഴ്‌നാട്ടിൽ ഓട്ടോറിക്ഷാ യാത്രാനിരക്കുകൾ കുത്തനെ കൂട്ടി. നിലവിലുണ്ടായിരുന്ന 25 രൂപയുടെ മിനിമം നിരക്ക് ഇരട്ടിയാക്കി 50 രൂപയായി നിശ്ചയിച്ചു. 2013 ഓഗസ്റ്റിനു ശേഷം ഇതാദ്യമായാണ് സംസ്ഥാനത്ത് ഓട്ടോ ചാർജിൽ മാറ്റം വരുത്തുന്നത്.

പുതുക്കിയ നിരക്കുപ്രകാരം ആദ്യത്തെ 1.8 കിലോമീറ്ററിന് 50 രൂപയും, പിന്നീട് പിന്നിടുന്ന ഓരോ കിലോമീറ്ററിനും 25 രൂപ വീതവും നൽകണം. ചുരം റോഡുകളിൽ അടിസ്ഥാന നിരക്ക് 60 രൂപയും തുടർന്നുള്ള ഓരോ കിലോമീറ്ററിന് 30 രൂപയുമാണ്. കൂടാതെ വെയിറ്റിങ് ചാർജ് മിനിറ്റിന് ഒരു രൂപയായും, രാത്രി 10 മണി മുതൽ പുലർച്ചെ 5 മണി വരെയുള്ള സർവീസുകൾക്ക് സാധാരണ നിരക്കിന്റെ ഒന്നര ഇരട്ടിയും നൽകേണ്ടതുണ്ട്.

സംസ്ഥാനത്തെ ഏകദേശം 3.46 ലക്ഷത്തോളം വരുന്ന ഓട്ടോറിക്ഷകൾക്ക് പുതിയ നിരക്ക് ബാധകമായിരിക്കും. ഇന്ധനവില, ഇൻഷുറൻസ്, അറ്റകുറ്റപ്പണി എന്നിവയിലെ ചെലവ് വർധനയും ആപ്പ് അധിഷ്ഠിത ടാക്സികളുടെ കടുത്ത മത്സരവും ചൂണ്ടിക്കാട്ടി ഓട്ടോ തൊഴിലാളി യൂണിയനുകൾ ഉന്നയിച്ച ദീർഘകാല ആവശ്യത്തെ തുടർന്നാണ് ഈ തീരുമാനം. നിരക്ക് വർധനയ്ക്കൊപ്പം മീറ്റർ ഉപയോഗം ഉറപ്പാക്കുന്നതും പ്രാബല്യത്തിൽ വരും.