ന്യൂഡൽഹി: കണ്ണൂർ സർവകലാശാലയിലെ പ്രിയ വർഗീസിന്റെ അസോസിയേറ്റ് പ്രൊഫസർ നിയമനം റദ്ദാക്കണമെന്ന് ആവശ്യപ്പെട്ടുള്ള ഹർജികളിൽ സുപ്രീം കോടതിയിൽ വാദം പൂർത്തിയായി. കേസ് വിധി പറയാനായി മാറ്റിവെച്ച കോടതി, പ്രിയ വർഗീസിനോട് യോഗ്യതാ വിവരങ്ങൾ പട്ടികയായി സമർപ്പിക്കാൻ ആവശ്യപ്പെട്ടു; ഹർജിക്കാരനായ ഡോ. ജോസഫ് സ്കറിയ ഒരാഴ്ചയ്ക്കകം ഇതിന് മറുപടി നൽകണം.
പ്രിയ വർഗീസിന്റെ നിയമനം ശരിവെച്ച ഹൈക്കോടതി ഡിവിഷൻ ബെഞ്ചിന്റെ വിധിക്കെതിരെ യുജിസിയും ഡോ. ജോസഫ് സ്കറിയയുമാണ് പരമോന്നത കോടതിയെ സമീപിച്ചത്. ഗവേഷണ കാലയളവും ഡെപ്യൂട്ടേഷൻ കാലയളവും അധ്യാപന പരിചയമായി കണക്കാക്കാൻ കഴിയില്ലെന്നാണ് യുജിസിയുടെ പ്രധാന വാദം. എന്നാൽ, അധ്യാപന ചുമതലകളോടെയുള്ള ഗവേഷണമാണെങ്കിൽ അത് അധ്യാപന പരിചയമായി പരിഗണിക്കാമെന്നും, സർവീസിലിരിക്കെ അവധിയെടുക്കാതെ ഗവേഷണം നടത്തുന്നവർക്ക് ഇളവ് നൽകണമെന്നും കഴിഞ്ഞ ദിവസം വാദം കേൾക്കവേ കോടതി വാക്കാൽ നിരീക്ഷിച്ചിരുന്നു.
അസോസിയേറ്റ് പ്രൊഫസർ നിയമനത്തിൽ യുജിസി ചട്ടങ്ങൾ കർശനമായി പാലിക്കണമെന്നാണ് തങ്ങളുടെ നിലപാടെന്ന് കണ്ണൂർ സർവകലാശാല സുപ്രീം കോടതിയിൽ വ്യക്തമാക്കി. സർവകലാശാലയ്ക്കുവേണ്ടി സീനിയർ അഭിഭാഷകൻ നിഖിൽ ഗോയൽ, സ്റ്റാൻഡിങ് കോൺസൽ സുൽഫിക്കർ അലി എന്നിവരും, യുജിസിക്കുവേണ്ടി അഡീഷണൽ സോളിസിറ്റർ ജനറൽ കെ.എം. നടരാജനും ഹാജരായി.
