ന്യൂഡൽഹി: കോടതി നിർദ്ദേശങ്ങൾ ലംഘിച്ച് പോലീസ് പീഡിപ്പിച്ചുവെന്ന് ചൂണ്ടിക്കാട്ടി അഭിഭാഷക സ്വാതി സിംഗ് മാലിക് സുപ്രീം കോടതിയെ സമീപിച്ചതായി 'ബാർ ആൻഡ് ബെഞ്ച്' റിപ്പോർട്ട് ചെയ്തു. അഭിഭാഷകരെ തടഞ്ഞുവെച്ചതുമായി ബന്ധപ്പെട്ട് സുപ്രീം കോടതിയിൽ നിലവിലുള്ള കോടതിയലക്ഷ്യ നടപടികളിൽ ഇടപെടണമെന്നാണ് ഹർജിയിലെ ആവശ്യം.
ഒക്ടോബർ 10-ന് ഡൽഹിയിൽ അഭിഭാഷകർ നടത്തിയ പ്രതിഷേധത്തിനിടെ നാല് വനിതാ പോലീസ് ഉദ്യോഗസ്ഥർ ചേർന്ന് തന്നെ ബലംപ്രയോഗിച്ച് തടഞ്ഞുവെക്കുകയും കൈയേറ്റം ചെയ്യുകയും ചെയ്തതായി സ്വാതി മാലിക് ആരോപിച്ചു.
പോലീസ് നടപടിയിൽ ശരീരത്തിൽ ചതവുകളേറ്റെന്നും വായുസഞ്ചാരമില്ലാത്ത പോലീസ് ബസിലേക്ക് തന്നെ ബലമായി തള്ളിക്കയറ്റിയെന്നും ഹർജിയിൽ പറയുന്നു. തങ്ങളുടെ കൈവശമുണ്ടായിരുന്ന ഭരണഘടനാ ആമുഖത്തിന്റെ പോസ്റ്റർ പോലീസ് കീറിയെറിഞ്ഞതായും അഭിഭാഷക വ്യക്തമാക്കി.
