ഡൽഹി: ദേശീയ തലസ്ഥാനത്തെ പോലീസ് നടപടിക്കെതിരെ രൂക്ഷമായ വിമർശനം ഉന്നയിച്ച ലോക്സഭാ പ്രതിപക്ഷ നേതാവ് രാഹുൽ ഗാന്ധി, വിഷയത്തിൽ ഇന്ന് സുപ്രീം കോടതിയിലേക്ക് മാർച്ച് നടത്തി ഹർജി ഫയൽ ചെയ്യുമെന്ന് വ്യക്തമാക്കി. ഡൽഹിയെ പൂർണ്ണമായും കോട്ടയാക്കി മാറ്റി ജനങ്ങളെ തടവിലിട്ടിരിക്കുകയാണെന്നും ആർഎസ്എസ് ഗുണ്ടകൾ സ്ത്രീകളെ ആക്രമിക്കുകയാണെന്നും വാർത്താസമ്മേളനത്തിൽ അക്രമ ദൃശ്യങ്ങൾ പ്രദർശിപ്പിച്ചുകൊണ്ട് അദ്ദേഹം ആരോപിച്ചു.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ അഴിമതികളെക്കുറിച്ചുള്ള കൃത്യമായ വിവരങ്ങൾ തങ്ങൾക്ക് ലഭിച്ചിട്ടുണ്ടെന്നും അദ്ദേഹത്തെ വെറുതെ വിടില്ലെന്നും രാഹുൽ ഗാന്ധി പറഞ്ഞു. ഗ്യാനേഷ് കുമാർ എന്തുകൊണ്ട് രാജിവെയ്ക്കുന്നില്ലെന്നും എത്രനാൾ അദ്ദേഹത്തെ സംരക്ഷിക്കുമെന്നും ചോദിച്ച അദ്ദേഹം, കാലം ഇതിന് കണക്കുചോദിക്കുമെന്ന് മുന്നറിയിപ്പ് നൽകി.
ഭരണഘടനാ സംരക്ഷണത്തിനായുള്ള ഈ നീക്കം ഒറ്റ ദിവസത്തെ സമരമല്ലെന്നും അഞ്ച് ക്രിമിനലുകളെ നിയമത്തിന് മുന്നിൽ എത്തിക്കുന്നത് വരെ പോരാട്ടം തുടരുമെന്നും അദ്ദേഹം വ്യക്തമാക്കി. രാജ്യത്തെയും ജനങ്ങളെയും താൻ സംരക്ഷിക്കുമെന്നും പോരാട്ടത്തിൽ സാധ്യമായ രീതിയിലെല്ലാം തങ്ങളെ പിന്തുണയ്ക്കണമെന്നും രാഹുൽ ഗാന്ധി മുഴുവൻ ഇന്ത്യൻ പൗരന്മാരോടും ആവശ്യപ്പെട്ടു.
