ലഖ്‌നൗ: സ്വർണാഭരണം മോഷ്ടിച്ചെന്നാരോപിച്ച് ഉത്തർപ്രദേശിലെ ബിജെപി എംഎൽഎ സുശാന്ത് സിങ്ങിന്റെ വസതിയിൽ മൂന്ന് യുവാക്കളെ തടങ്കലിൽ വെച്ച് ക്രൂരമായി മർദ്ദിച്ചതായി പരാതി. എംഎൽഎയുടെ വീട്ടിലെ ജോലിക്കാരായ അതുൽ, ലവേഷ്, ഇവരുടെ സുഹൃത്തായ രാമു എന്നിവരാണ് അതിക്രമത്തിനിരയായി കാശിപൂരിലെ ആശുപത്രിയിൽ ചികിത്സയിലുള്ളത്; ഇതിൽ രാമുവിന്റെ ആരോഗ്യനില അതീവ ഗുരുതരമാണെന്ന് പോലീസ് വ്യക്തമാക്കി.
എംഎൽഎയുടെ മകന്റെ സ്വർണ്ണ ബ്രേസ്‌ലെറ്റ് കാണാതായതിനെത്തുടർന്ന് ഒക്ടോബർ ഏഴിന് രാമുവിനെ വീട്ടിൽ നിന്ന് കൊണ്ടുപോയതാണെന്ന് മാതാവ് ഓംവതി പറഞ്ഞു. യുവാക്കളെ തലകീഴായി കെട്ടിത്തൂക്കി ബെൽറ്റുകൊണ്ട് അടിക്കുകയും ഷോക്കടിപ്പിക്കുകയും ചെയ്ത അക്രമികൾ, മുറിവുകളിൽ ഉപ്പുതേച്ചതായും കുടുംബം ആരോപിക്കുന്നു. എംഎൽഎയുടെ സഹായികൾ ഉൾപ്പെടെ ആറുപേർക്കെതിരെയും കണ്ടാലറിയാവുന്ന ഒൻപത് പേർക്കെതിരെയും എഫ്ഐആർ രജിസ്റ്റർ ചെയ്യണമെന്ന് ആവശ്യപ്പെട്ട് പരാതി ലഭിച്ചതായും, അന്വേഷണം നടത്തിയ ശേഷം തുടർനടപടികൾ സ്വീകരിക്കുമെന്നും മൊറാദാബാദ് എസ്പി (റൂറൽ) കുൻവർ ആകാശ് സിങ് വ്യക്തമാക്കി.
എന്നാൽ തനിക്കെതിരെയുള്ള ആരോപണങ്ങൾ നിഷേധിച്ച എംഎൽഎ സുശാന്ത് സിങ്, ആഭരണം കാണാതായതിൽ ഇവരെ ചോദ്യം ചെയ്യുക മാത്രമാണ് ചെയ്തതെന്നും ആരെയും ഉപദ്രവിച്ചിട്ടില്ലെന്നും പ്രതികരിച്ചു. സംഭവത്തിൽ ഉടൻ നിയമനടപടി സ്വീകരിച്ച് യുവാക്കൾക്ക് നീതി നൽകണമെന്ന് സമാജ്‌വാദി പാർട്ടി നേതാവും മൊറാദാബാദ് എംപിയുമായ രുചി വീര ആവശ്യപ്പെട്ടു.
