ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ജന്തർ മന്തറിൽ സംഘടിപ്പിച്ച പ്രതിഷേധത്തിന്റെ പേരിൽ കോൺഗ്രസ് നേതാക്കളായ രാഹുൽ ഗാന്ധിക്കും പ്രിയങ്കാ ഗാന്ധിക്കുമെതിരെ ഡൽഹി പോലീസ് മൂന്ന് കേസുകൾ രജിസ്റ്റർ ചെയ്തു. ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥരെ കയ്യേറ്റം ചെയ്തുവെന്നും ഔദ്യോഗിക കൃത്യനിർവഹണം തടസ്സപ്പെടുത്തിയെന്നുമാണ് നേതാക്കൾക്കെതിരായ എഫ്ഐആറുകളിലെ പ്രധാന കണ്ടെത്തൽ.
പ്രതിപക്ഷ സമരത്തെ ബലംപ്രയോഗിച്ച് അടിച്ചമർത്തിയ പോലീസ് നടപടിയിൽ പ്രതിഷേധിച്ച് കോൺഗ്രസ് ഇന്ന് കരിദിനം ആചരിക്കുകയും രാജ്യവ്യാപക പ്രതിഷേധ പരിപാടികൾ സംഘടിപ്പിക്കുകയും ചെയ്യും. വിഷയം ഉന്നയിച്ച് രാഷ്ട്രപതിയുമായി കൂടിക്കാഴ്ചയ്ക്ക് പ്രതിപക്ഷം നേരത്തെ കത്ത് നൽകിയിരുന്ന പശ്ചാത്തലത്തിൽ, 'ഇന്ത്യ' മുന്നണിയിലെ പത്ത് പ്രമുഖ നേതാക്കൾക്ക് ഉടൻ രാഷ്ട്രപതിയെ കാണാൻ അനുമതി ലഭിക്കുമെന്നാണ് വിവരം.
ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിപക്ഷ പ്രക്ഷോഭങ്ങൾ തുടരുന്നതിനാൽ ഡൽഹി നഗരത്തിൽ സംഘർഷ സാധ്യത കണക്കിലെടുത്ത് വൻ പോലീസ് സന്നാഹത്തെ വിന്യസിച്ചിട്ടുണ്ട്. ജന്തർ മന്തറും പരിസര പ്രദേശങ്ങളും പൂർണ്ണമായും കനത്ത സുരക്ഷാ വലയത്തിലാണ്.
