ഭിന്ദ്: ക്ലാസ് മുറിയിൽ പഠിപ്പിക്കുന്നതിന് പകരം മൊബൈൽ ഫോണിൽ ഗെയിം കളിക്കുകയും പെൺകുട്ടികളോട് ഇൻസ്റ്റാഗ്രാം വിവരങ്ങൾ ആവശ്യപ്പെടുകയും ചെയ്തെന്ന പരാതിയുമായി സർക്കാർ സ്കൂൾ അധ്യാപകനെതിരെ വിദ്യാർത്ഥിനികൾ രംഗത്ത്. മധ്യപ്രദേശിലെ ഭിന്ദ് ജില്ലയിലാണ് സംഭവം. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ പങ്കുവെക്കപ്പെട്ടതോടെ സംഭവം വലിയ ചർച്ചയായിട്ടുണ്ട്.
ഭിന്ദ് ജില്ലയിലെ കോട് ഗ്രാമത്തിൽ സ്ഥിതി ചെയ്യുന്ന സർക്കാർ ഹൈസ്കൂളിലാണ് പരാതിക്ക് ആസ്പദമായ സംഭവം നടന്നത്. നയാഗാവ് പോലീസ് സ്റ്റേഷൻ പരിധിയിൽ വരുന്ന ഈ വിദ്യാലയത്തിലെ അധ്യാപകനായ പ്രശാന്തിനെതിരെയാണ് വിദ്യാർത്ഥിനികൾ പരസ്യ ആരോപണം ഉന്നയിച്ചിരിക്കുന്നത്. അധ്യാപനത്തിൽ ഒട്ടും ശ്രദ്ധിക്കാതെ ക്ലാസ് നടക്കുന്ന സമയത്ത് ഇയാൾ തുടർച്ചയായി മൊബൈൽ ഫോണിൽ ഗെയിം കളിക്കുകയാണെന്ന് കുട്ടികൾ ചൂണ്ടിക്കാട്ടി.
പെൺകുട്ടികളോട് ഇയാൾ ഇൻസ്റ്റാഗ്രാം ഐഡി ആവശ്യപ്പെട്ടതായി ഒരു വിദ്യാർത്ഥിനി മാധ്യമങ്ങളോട് വെളിപ്പെടുത്തി. അധ്യാപകൻ ക്ലാസിലേക്ക് എത്തുന്നത് കുട്ടികളെ പഠിപ്പിക്കാനാണോ അതോ പെൺകുട്ടികളുടെ ഇൻസ്റ്റാഗ്രാം ഐഡി ചോദിക്കാനാണോ എന്ന് വിദ്യാർത്ഥിനി ചോദ്യമുയർത്തി. കൂടാതെ ക്ലാസ് നടക്കുന്ന വേളയിൽ മേശപ്പുറത്ത് കാൽ കയറ്റിവെച്ചാണ് ഫോണിൽ ഗെയിമുകൾ കളിക്കുന്നതെന്നും വിദ്യാർത്ഥിനികൾ ആരോപിക്കുന്നു.
വിദ്യാർത്ഥികളും രക്ഷിതാക്കളും പരാതിയുമായി രംഗത്തെത്തിയതോടെയാണ് വിഷയം പുറംലോകമറിഞ്ഞത്. ഇതേക്കുറിച്ച് മാധ്യമപ്രവർത്തകർ പ്രതികരണം ആരാഞ്ഞെങ്കിലും അധ്യാപകൻ മറുപടി നൽകാൻ തയ്യാറായില്ലെന്നാണ് വിവരം. സംഭവത്തിൽ ഔദ്യോഗിക തലത്തിൽ അന്വേഷണം ഏർപ്പെടുത്തിയോ മറ്റ് നടപടികൾ സ്വീകരിച്ചോ എന്നതിൽ വ്യക്തത വന്നിട്ടില്ല. വിദ്യാർത്ഥിനികൾ ഉന്നയിച്ച ആക്ഷേപങ്ങൾ സ്വതന്ത്രമായി സ്ഥിരീകരിച്ചിട്ടില്ലെന്നും റിപ്പോർട്ടുകളിൽ വ്യക്തമാക്കുന്നുണ്ട്.
