പൂനെ: യുവ വ്യവസായി കേതൻ അഗർവാളിനെ കൊലപ്പെടുത്തിയ കേസിൽ ഞെട്ടിപ്പിക്കുന്ന വിവരങ്ങൾ പുറത്ത്. പൂനെ പോലീസ് കോടതിയിൽ സമർപ്പിച്ച 5,300-ലധികം പേജുകളുള്ള കുറ്റപത്രത്തിലാണ് ആസൂത്രണത്തിന്റെ പൂർണ്ണ വിവരങ്ങൾ വ്യക്തമാക്കുന്നത്. കേതനെ കൊലപ്പെടുത്തുന്നതിന് മുൻപ് ബെംഗളൂരുവിലേക്ക് കൊണ്ടുപോയി കൈകാലുകൾ അടിച്ച് തകർക്കാനായിരുന്നു പ്രതികൾ ആദ്യം ലക്ഷ്യമിട്ടിരുന്നത്. പ്രതികളിൽ ഒരാളായ റിതേഷ് ഹങ്കെ ബെംഗളൂരുവിലുള്ള തന്റെ ഒരു സുഹൃത്തിനോട് ഇക്കാര്യം ആലോചിച്ചെങ്കിലും ആ സുഹൃത്ത് ഈ ആശയത്തെ കർശനമായി എതിർക്കുകയായിരുന്നു.

ഇരുപത്തിയഞ്ചുകാരനായ വ്യവസായി കേതൻ അഗർവാളിന്റെ കൊലപാതകത്തിൽ പ്രതിശ്രുതവധു സിയ ഗോയൽ, ഇവരുടെ കാമുകൻ ചേതൻ ചൗധരി എന്നിവരടക്കം മൂന്നുപേരെയാണ് പൂനെ പോലീസ് അറസ്റ്റ് ചെയ്തിട്ടുള്ളത്. കേതന്റെ കൈകാലുകൾ തല്ലിയൊടിക്കാനുള്ള ആദ്യ നീക്കം സുഹൃത്തിന്റെ എതിർപ്പുമൂലം ഉപേക്ഷിച്ചതോടെയാണ് ചേതൻ ചൗധരിയും സിയ ഗോയലും ചേർന്ന് കൊലപാതകം നടത്താൻ തീരുമാനിച്ചത്. ഇതിനായി പ്രതികൾ കുറ്റകൃത്യ സിനിമകൾ കാണുകയും കൃത്യം എങ്ങനെ നിർവ്വഹിക്കണമെന്ന് കണ്ടെത്താൻ ചാറ്റ് ജിപിടിയുടെ (ChatGPT) സഹായം തേടുകയും ചെയ്തു. പോലീസിന്റെ വലയിൽ വീഴാതെ രക്ഷപ്പെടാനുള്ള വഴികൾ മനസ്സിലാക്കാൻ ക്രൈം പോഡ്‌കാസ്റ്റുകളും ഇവർ തുടർച്ചയായി കേട്ടിരുന്നു.

പ്രീ-വെഡ്ഡിങ് ഷൂട്ടിനായുള്ള യാത്രയ്ക്കിടെ ജൂൺ 6-ന് സിയ ഗോയൽ കേതന്റെ പാസ്‌പോർട്ട് കീറിപ്പറിച്ച് ഒരു കഫേയിലെ വാഷ്‌റൂമിൽ ഉപേക്ഷിച്ചു. യാത്ര മുടക്കുകയെന്ന ലക്ഷ്യത്തോടെ കാമുകനായ ചേതൻ ചൗധരിയുടെ നിർദ്ദേശപ്രകാരമാണ് സിയ ഇത് ചെയ്തത്. തുടർന്ന്, തങ്ങൾക്ക് അറിയാവുന്ന മറ്റൊരു യുവതിയുടെ ചിത്രം ഉപയോഗിച്ച് 'മഹി' എന്ന പേരിൽ വ്യാജ ഇൻസ്റ്റാഗ്രാം അക്കൗണ്ട് തുറക്കാൻ ചേതൻ ആവശ്യപ്പെട്ടു.

ജൂൺ 18-ന് സിയയോടൊപ്പം ചേർന്ന് ലോഹഗഡ് കോട്ടയിൽ അപ്രതീക്ഷിത ജന്മദിനാഘോഷം ഒരുക്കിയിട്ടുണ്ടെന്ന് ധരിപ്പിച്ച് കേതനെ അങ്ങോട്ടേക്ക് വിളിച്ചുവരുത്താനാണ് ഈ വ്യാജ പ്രൊഫൈലിൽ നിന്നുള്ള സന്ദേശങ്ങൾ ഉപയോഗിച്ചത്. കേതനെ തന്ത്രപൂർവ്വം കോട്ടയിലേക്ക് എത്തിക്കാനുള്ള കെണിയായിരുന്നു ഈ അക്കൗണ്ട്. കൊലപാതകം പൂർത്തിയാക്കിയ ശേഷം പ്രതികൾ ഈ ഇൻസ്റ്റാഗ്രാം ഐഡി നീക്കം ചെയ്യുകയും ചെയ്തു. കേതൻ അഗർവാളുമായുള്ള വിവാഹത്തിന് തനിക്ക് ഒട്ടും താൽപ്പര്യമില്ലെന്ന് സിയ ഗോയൽ പലരോടും വ്യക്തമാക്കിയിരുന്നതായും കുറ്റപത്രത്തിൽ ചൂണ്ടിക്കാട്ടുന്നു.