ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ പ്രധാനമന്ത്രി നരേന്ദ്ര മോദിയുടെ വെറുമൊരു കളിപ്പാവയായി മാറിയെന്ന് എഐസിസി പ്രസിഡന്റ് മല്ലികാർജുൻ ഖർഗെ. ഡൽഹിയിൽ ചേർന്ന കോൺഗ്രസ് പ്രവർത്തക സമിതി (സിഡബ്ല്യുസി) യോഗത്തിലാണ് മോദി സർക്കാരിനെതിരെ അദ്ദേഹം അതിരൂക്ഷമായ വിമർശനങ്ങൾ ഉന്നയിച്ചത്. രാജ്യത്തിന്റെ ജനാധിപത്യ മൂല്യങ്ങളും ഭരണഘടനയും സംരക്ഷിക്കാനുള്ള ചരിത്രപരമായ കടമ കോൺഗ്രസിനുണ്ടെന്ന് അദ്ദേഹം വ്യക്തമാക്കി. വോട്ടർ പട്ടികയിൽ പേര് ചേർക്കുന്നതിനുള്ള ഫോം 6-ൽ ബോധപൂർവ്വം മാറ്റങ്ങൾ വരുത്തി പുതിയ തലമുറയിലെ വോട്ടർമാരെ (Gen Z) മാറ്റിനിർത്താൻ മോദി സർക്കാർ ശ്രമിച്ചതായും ഖർഗെ കുറ്റപ്പെടുത്തി.

ഇന്ന് ഒത്തുചേർന്ന പ്രവർത്തക സമിതി യോഗം അതീവ നിർണ്ണായകമാണെന്ന് ഓർമ്മിപ്പിച്ച ഖർഗെ, കൊളോണിയൽ ഭരണകാലത്തെ അനുസ്മരിപ്പിക്കും വിധം ഇന്ത്യയുടെ ഭരണഘടനയെയും ജനാധിപത്യ ഘടനയെയും കാത്തുസൂക്ഷിക്കാനുള്ള ഉത്തരവാദിത്തം കോൺഗ്രസ് വീണ്ടും ഏറ്റെടുക്കുകയാണെന്ന് പ്രഖ്യാപിച്ചു. പൂർവികർ ബ്രിട്ടീഷുകാരിൽ നിന്ന് പോരാടി നേടിയെടുത്ത വോട്ടവകാശം അട്ടിമറിക്കപ്പെടാതിരിക്കാൻ നാം ഇന്ന് വീണ്ടും സമരമുഖത്തേക്ക് ഇറങ്ങേണ്ട സ്ഥിതിയാണെന്നും അദ്ദേഹം ചൂണ്ടിക്കാട്ടി.

ത്യാഗോജ്ജ്വലമായ പോരാട്ടങ്ങളിലൂടെയും രക്തസാക്ഷിത്വങ്ങളിലൂടെയും നമ്മുടെ പൂർവികർ പടുത്തുയർത്തിയ ജനാധിപത്യത്തിന്റെ അടിത്തറയെ കഴിഞ്ഞ 12 വർഷത്തെ ഭരണം കൊണ്ട് ആസൂത്രിത ഗൂഢാലോചനകളിലൂടെ മോദി സർക്കാർ തകർത്തതായി ഖർഗെ തന്റെ 'എക്സ്' (ട്വിറ്റർ) കുറിപ്പിൽ വ്യക്തമാക്കി. വോട്ടർ പട്ടികയിൽ നിന്ന് അർഹരായ പൗരന്മാരുടെ പേരുകൾ വ്യാപകമായി ഒഴിവാക്കി. ഈ നടപടികൾക്ക് കൂട്ടുനിൽക്കുന്ന മുഖ്യ തെരഞ്ഞെടുപ്പ് കമ്മീഷണർ മോദി സർക്കാരിന്റെ ഇംഗിതത്തിന് വഴങ്ങുന്ന വെറുമൊരു ഉപകരണമായി തരംതാണിരിക്കുന്നു. ഇത് ഇന്ത്യൻ ജനാധിപത്യ വ്യവസ്ഥയ്ക്ക് തീർത്തും വിരുദ്ധമാണ്. അർഹതയുള്ള ഓരോ സമ്മതിദായകന്റെയും വോട്ട് സംരക്ഷിക്കപ്പെടേണ്ടതുണ്ട്; എന്നാൽ ഇവിടെ രക്ഷകനാകേണ്ടവർ തന്നെ ഭീകരമായി വേട്ടക്കാരായി മാറിയിരിക്കുകയാണ്. ജനങ്ങളുടെ വോട്ടുകൾ സംരക്ഷിക്കാൻ ഭരണഘടന പൂർണ്ണ അധികാരം നൽകിയ വ്യക്തി തന്നെ വോട്ട് കവർച്ചക്ക് നേതൃത്വം നൽകുന്നു. സ്വന്തം സഹപ്രവർത്തകർക്കുപോലും അവിശ്വാസമുള്ള ഒരാളെ രാജ്യത്തെ ജനങ്ങൾ എങ്ങനെ വിശ്വസിക്കുമെന്നും അദ്ദേഹം ചോദിച്ചു.

അതേസമയം, തെരഞ്ഞെടുപ്പ് കമ്മീഷനെതിരായ പൊതുപ്രതിഷേധം രാജ്യത്തുടനീളം ശക്തിപ്പെടുകയാണ്. മുഖ്യ തെരഞ്ഞെടുപ്പ് കമ്മീഷണർ സ്ഥാനം ഗ്യാനേഷ് കുമാർ സ്വമേധയാ രാജിവെച്ച് ഒഴിയണമെന്ന് യോഗേന്ദ്ര യാദവ് റിപ്പോർട്ടറിനോട് വ്യക്തമാക്കി. എസ്ഐആർ (SIR) സോഫ്റ്റ്‌വെയറിലുള്ള സാങ്കേതിക പരിമിതികൾ രേഖപ്പെടുത്തി മഹാരാഷ്ട്രയിലെ മുഖ്യ തെരഞ്ഞെടുപ്പ് ഓഫീസർ കേന്ദ്ര തെരഞ്ഞെടുപ്പ് കമ്മീഷന് ഔദ്യോഗിക കത്തയച്ചിട്ടുണ്ട്. വോട്ടർ പട്ടികയിലെ കൂട്ടവെട്ടിനിരത്തലുകൾക്ക് പിന്നിൽ വൻ തലത്തിലുള്ള രാഷ്ട്രീയ ഗൂഢാലോചനയുണ്ടെന്നാണ് കോൺഗ്രസ് നേതൃത്വം ഉറപ്പിച്ചു പറയുന്നത്. വരും ദിവസങ്ങളിലെ രാജ്യവ്യാപക പ്രതിഷേധ പരിപാടികൾക്ക് രൂപം നൽകാൻ ചേർന്ന കോൺഗ്രസ് പ്രവർത്തക സമിതി യോഗം ഡൽഹിയിൽ തുടരുകയാണ്. ഗ്യാനേഷ് കുമാറിനെതിരെ സുപ്രീം കോടതിയെ സമീപിക്കുന്നതും, ഇംപീച്ച്മെന്റ് നോട്ടീസ് നൽകുന്നതുൾപ്പെടെയുള്ള തുടർ നിയമനടപടികളും യോഗത്തിൽ പരിഗണിക്കുന്നുണ്ട്. ഇതിനിടെ, ഗ്യാനേഷ് കുമാറിന്റെ രാജി ആവശ്യപ്പെട്ടുകൊണ്ട് സിപിഐഎം, സിപിഐ ഉൾപ്പെടെയുള്ള അഞ്ച് ഇടതുപക്ഷ പാർട്ടികൾ തെരഞ്ഞെടുപ്പ് കമ്മീഷൻ ആസ്ഥാനത്തേക്ക് ഉടൻ പ്രതിഷേധ മാർച്ച് സംഘടിപ്പിക്കും.