ന്യൂഡൽഹി: കൊച്ചുകുട്ടികളെ ഉൾപ്പെടുത്തി ചിത്രീകരിച്ച രാഷ്ട്രീയ സ്വഭാവമുള്ള ദൃശ്യങ്ങൾ ഇൻസ്റ്റാഗ്രാമിലൂടെ പ്രചരിപ്പിക്കപ്പെട്ട സംഭവത്തിൽ മെറ്റയ്ക്കും കേന്ദ്ര ഇലക്ട്രോണിക്സ്–ഐടി മന്ത്രാലയത്തിനും ദേശീയ മനുഷ്യാവകാശ കമ്മീഷൻ നോട്ടീസ് അയച്ചു. ഉത്തർപ്രദേശിലെ ഒരു കോച്ചിംഗ് സ്ഥാപനത്തിൽ നിന്നുള്ള വിദ്യാർത്ഥികളെക്കൊണ്ട് സംസാരിപ്പിച്ച വീഡിയോകളിൽ, പ്രധാനമന്ത്രി നരേന്ദ്ര മോദിക്കെതിരെയുള്ള കടുത്ത വിമർശനങ്ങളും അടങ്ങിയിരുന്നു. വിഷയത്തിൽ ഉത്തർപ്രദേശിലെ എറ്റാ ജില്ലാ ഭരണകൂടത്തിനും കമ്മീഷൻ ഔദ്യോഗിക നോട്ടീസ് നൽകിയിട്ടുണ്ട്.
സംഭവവുമായി ബന്ധപ്പെട്ട് രണ്ടാഴ്ചയ്ക്കകം യുക്തമായ നടപടികൾ സ്വീകരിക്കണമെന്ന് മനുഷ്യാവകാശ കമ്മീഷൻ അന്ത്യശാസനം നൽകി. ഒപ്പം, ദൃശ്യങ്ങളിൽ പ്രത്യക്ഷപ്പെട്ട കുട്ടികളെ തിരിച്ചറിഞ്ഞ് ആവശ്യമായ സുരക്ഷ ഉറപ്പുവരുത്തണമെന്നും അവർക്ക് മതിയായ കൗൺസിലിംഗ് നൽകണമെന്നും നിർദ്ദേശിച്ചിട്ടുണ്ട്. കുട്ടികളുടെ ഇത്തരം വീഡിയോകൾ ചിത്രീകരിച്ച് സമൂഹമാധ്യമങ്ങളിൽ പങ്കുവെച്ച വ്യക്തികളെക്കുറിച്ച് വിശദമായി അന്വേഷിക്കാൻ പോലീസിന് നിർദ്ദേശം നൽകിയിട്ടുണ്ട്. സ്വമേധയാ കേസെടുക്കാൻ (കോഗ്നിസിബിൾ) തക്കതായ കാരണങ്ങളുണ്ടെന്ന് കണ്ടെത്തിയാൽ എഫ്ഐആർ രജിസ്റ്റർ ചെയ്യാനും, ഇതിന് ആധാരമായ ഡിജിറ്റൽ തെളിവുകൾ നശിച്ചുപോകാതെ സംരക്ഷിക്കാനും പോലീസിനോട് ആവശ്യപ്പെട്ടു.
വീഡിയോകൾ വ്യാപകമായി പ്രചരിപ്പിക്കപ്പെട്ട പശ്ചാത്തലത്തിലാണ് മെറ്റയോട് കമ്മീഷൻ കൃത്യമായ വിശദീകരണം ആരാഞ്ഞത്. ഈ ഉള്ളടക്കത്തിൽ നിന്ന് എന്തെങ്കിലും തരത്തിലുള്ള സാമ്പത്തിക വരുമാനമോ വാണിജ്യപരമായ ലാഭമോ നേടിയിട്ടുണ്ടോയെന്നും, ഡിജിറ്റൽ വിവരങ്ങൾ സൂക്ഷിക്കുന്നതിനും ഇത്തരം ഉള്ളടക്കങ്ങൾ നീക്കം ചെയ്യുന്നതിനും എന്തൊക്കെ മുൻകരുതലുകൾ സ്വീകരിച്ചിട്ടുണ്ടെന്നും നോട്ടീസിൽ ചോദിച്ചിട്ടുണ്ട്. കൂടാതെ, അടിയന്തര പരിശോധനകൾ നടത്തി കുട്ടികളുടെ സുരക്ഷിതത്വം വിലയിരുത്താനും അവരുടെ പരാതി പരിഹാര സംവിധാനങ്ങൾ കാര്യക്ഷമമാക്കാനും കേന്ദ്ര ഇലക്ട്രോണിക്സ്–ഐടി മന്ത്രാലയത്തോട് കമ്മീഷൻ നിർദ്ദേശിച്ചു.
