കൊൽക്കത്ത: മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് പ്രതിപക്ഷ കക്ഷികൾ തെരുവിലിറങ്ങുമ്പോൾ, ഗ്യാനേഷ് കുമാറിന് പത്മഭൂഷൺ ബഹുമതി നൽകി ആദരിക്കണമെന്ന വിചിത്ര ആവശ്യവുമായി ബിജെപി. പശ്ചിമ ബംഗാൾ ബിജെപി സംസ്ഥാന അധ്യക്ഷൻ സമിക് ഭട്ടാചാര്യയാണ് ഗ്യാനേഷ് കുമാർ പത്മഭൂഷണ് പൂർണ്ണ അർഹനാണെന്ന് പ്രഖ്യാപിച്ച് രംഗത്തെത്തിയത്. ബംഗാളിൽ അങ്ങേയറ്റം സുതാര്യമായ രീതിയിലാണ് അദ്ദേഹം വോട്ടെടുപ്പ് പൂർത്തിയാക്കിയതെന്നും ജനങ്ങൾ ഈ തെരഞ്ഞെടുപ്പിൽ അതീവ സന്തുഷ്ടരാണെന്നും ബിജെപി വാദിക്കുന്നു. ഒപ്പം, രാഹുൽ ഗാന്ധി പറയുന്ന കാര്യങ്ങൾ സ്വന്തം പാർട്ടിക്കാരായ കോൺഗ്രസുകാർ പോലും വകവെക്കുന്നില്ലെന്നും സമിക് ഭട്ടാചാര്യ പരിഹസിച്ചു.
സംസ്ഥാനത്തെ ജനങ്ങൾ തെരഞ്ഞെടുപ്പിൽ പൂർണ്ണ സംതൃപ്തി രേഖപ്പെടുത്തിയെന്നും കൊലപാതകങ്ങളോ അക്രമങ്ങളോ അരങ്ങേറിയില്ലെന്നും അദ്ദേഹം പറഞ്ഞു. പശ്ചിമ ബംഗാളിലെ മുഴുവൻ ജനങ്ങൾക്കും സുരക്ഷിതമായി സമ്മതിദാനാവകാശം വിനിയോഗിക്കാൻ കഴിഞ്ഞു. ബംഗാൾ പോലെയുള്ള അതിർത്തി പങ്കിടുന്ന ഒരു പ്രദേശത്ത്, അനധികൃത ബംഗ്ലാദേശി നുഴഞ്ഞുകയറ്റക്കാരെ വോട്ടർപട്ടികയിൽ നിന്ന് പൂർണ്ണമായി നീക്കം ചെയ്യാൻ ഗ്യാനേഷ് കുമാർ ശക്തമായ നടപടികളാണ് സ്വീകരിച്ചത്. അതിനാൽ അദ്ദേഹത്തിന് ചുരുങ്ങിയത് പത്മഭൂഷൺ പുരസ്കാരമെങ്കിലും സമ്മാനിക്കാൻ യോഗ്യതയുണ്ടെന്ന് സമിക് ഭട്ടാചാര്യ വ്യക്തമാക്കി.
മുഖ്യ തെരഞ്ഞെടുപ്പ് കമ്മീഷണർക്കെതിരെ ഗുരുതര ക്രമക്കേടുകൾ ആരോപിച്ച് രാജ്യവ്യാപക പ്രക്ഷോഭങ്ങൾ കൊടുമ്പിരിക്കൊള്ളുമ്പോഴാണ് ബിജെപിയുടെ ഈ അപ്രതീക്ഷിത പിന്തുണ. തെരഞ്ഞെടുപ്പ് കമ്മീഷനെതിരെ ഒന്നിച്ചുള്ള പ്രക്ഷോഭം അനിവാര്യമാണെന്ന് ചൂണ്ടിക്കാട്ടി സിപിഐഎം അടക്കമുള്ള പ്രസ്ഥാനങ്ങൾ രംഗത്തിറങ്ങിയിട്ടുണ്ട്. ഗ്യാനേഷ് കുമാർ സ്ഥാനമൊഴിഞ്ഞില്ലെങ്കിൽ തെരുവിലിറങ്ങി സമരം ചെയ്യുമെന്ന് സിജെപിയും മുന്നറിയിപ്പ് നൽകിയിട്ടുണ്ട്.
കമ്മീഷന്റെ സുപ്രധാന ചുമതലകളിൽ മറ്റ് രണ്ട് തെരഞ്ഞെടുപ്പ് കമ്മീഷണർമാർ ഔദ്യോഗിക വിയോജിപ്പുകൾ രേഖപ്പെടുത്തിയതോടെയാണ് നിലവിലെ വിവാദങ്ങൾക്ക് തുടക്കമായത്. പുതിയ വോട്ടർമാരുടെ പേര് ചേർക്കൽ, വോട്ടർപട്ടികയിൽ നിന്നുള്ള ഒഴിവാക്കലും തിരിച്ചുചേർക്കലും, എസ്.ഐ.ആർ പ്രക്രിയ വഴി പേരുകൾ പുനഃസ്ഥാപിക്കുന്നതിനെതിരെയുള്ള അപ്പീലുകൾ തീർപ്പാക്കൽ, വോട്ടർപട്ടികയുടെ ആധികാരികതയും സുരക്ഷിതത്വവും ഉറപ്പാക്കൽ തുടങ്ങിയ മൗലിക കാര്യങ്ങളിൽ ഇരുവരും ഭിന്നാഭിപ്രായം അറിയിച്ചിരുന്നു. ഇതിനിടയിൽ, ബിജെപി കമ്മീഷന് പൂർണ്ണ പിന്തുണ നൽകുമ്പോഴും ഉയർന്നുവന്ന ആരോപണങ്ങളിൽ തെരഞ്ഞെടുപ്പ് കമ്മീഷൻ വ്യക്തത വരുത്തണമെന്ന് എൻഡിഎ സഖ്യകക്ഷികൾ തന്നെ ആവശ്യപ്പെടുന്നുണ്ട്. തെലുഗു ദേശം പാർട്ടി, ലോക് ജനശക്തി പാർട്ടി, രാഷ്ട്രീയ ലോക് മോർച്ച തുടങ്ങിയ പാർട്ടികളാണ് ഈ ആവശ്യം ഉന്നയിച്ചത്. ഇത്തരത്തിൽ നാലുപാടുനിന്നും പ്രതിസന്ധികൾ കനക്കുന്ന ഘട്ടത്തിലാണ് ഗ്യാനേഷ് കുമാറിന് പത്മഭൂഷൺ പുരസ്കാരം നൽകണമെന്ന് ബിജെപി വാദിക്കുന്നത്.
