റായ്പൂർ: ഉത്തരേന്ത്യൻ സംസ്ഥാനങ്ങളിൽ പേമാരി നാശം വിതയ്ക്കുന്നു. ഛത്തീസ്ഗഡിൽ കനത്ത മഴക്കെടുതിയെത്തുടർന്ന് ഒരാൾ മരണപ്പെട്ടു. ബസ്തർ മേഖലയിൽ പ്രളയജലം ഉയർന്നതിനെത്തുടർന്ന് നിരവധി ഗ്രാമങ്ങൾ പൂർണ്ണമായും ഒറ്റപ്പെട്ട അവസ്ഥയിലാണ്. പ്രതികൂല കാലാവസ്ഥയെ മുൻനിർത്തി ബസ്തർ, ദന്തേവാഡ, ബിജാപൂർ, കൊണ്ടഗാവ്, കാങ്കർ, ഗരിയാബന്ദ്, ധംതരി, ദുർഗ് എന്നീ എട്ട് ജില്ലകളിലെ മുഴുവൻ സർക്കാർ-സ്വകാര്യ സ്കൂളുകൾക്കും ജില്ലാ ഭരണകൂടങ്ങൾ അവധി പ്രഖ്യാപിച്ചു. സർക്കാർ വിദ്യാലയങ്ങളിൽ നടക്കാനിരുന്ന ത്രൈമാസ പരീക്ഷകളും ഇതോടെ മാറ്റിവെച്ചിട്ടുണ്ട്. ഇതിനിടെ, ഉത്തരാഖണ്ഡിലും ഉത്തർപ്രദേശിലും വിവിധ ജില്ലകളിൽ കേന്ദ്ര കാലാവസ്ഥാ വകുപ്പ് റെഡ് അലർട്ട് പുറപ്പെടുവിച്ചു. ഒഡീഷയിൽ പ്രളയബാധിതരായ പതിനായിരത്തോളം ആളുകളെ സുരക്ഷിത ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു.
റായ്പൂർ, ദുർഗ്, ബസ്തർ ഡിവിഷനുകളിലാണ് മഴക്കെടുതി അതിരൂക്ഷമായി ബാധിച്ചത്. പ്രദേശത്തെ അരുവികളും തോടുകളും കരകവിഞ്ഞൊഴുകിയതോടെ പ്രധാന റോഡുകളിലും പാർപ്പിട മേഖലകളിലും വെള്ളക്കെട്ട് രൂപപ്പെട്ടു. ജഗ്ദൽപൂരിലെ താഴ്ന്ന പ്രദേശങ്ങളിലുള്ള ഒട്ടനവധി വീടുകളിലേക്കും പാർപ്പിട സമുച്ചയങ്ങളിലേക്കും വെള്ളം ഇരച്ചുകയറി. ദേശീയപാത 30-ൽ വെള്ളം കയറിയതിനെത്തുടർന്ന് റായ്പൂർ-ജഗ്ദൽപൂർ റൂട്ടിലെ വാഹനഗതാഗതം പൂർണ്ണമായി നിലച്ചു.
ജഗ്ദൽപൂർ വഴി കടന്നുപോകുന്ന ഇന്ദ്രാവതി നദിയുടെ തീരങ്ങളിലും സമീപത്തെ താഴ്ന്ന പ്രദേശങ്ങളിലും അതീവ ജാഗ്രതാ നിർദ്ദേശം നൽകിയിട്ടുണ്ട്. ദുരിതാശ്വാസ പ്രവർത്തനങ്ങൾ ഏകോപിപ്പിക്കുന്നതിനും സ്ഥിതിഗതികൾ നേരിട്ട് വിലയിരുത്തുന്നതിനുമായി ദുരന്തബാധിത പ്രദേശങ്ങളിൽ ക്യാമ്പ് ചെയ്ത് പ്രവർത്തിക്കാൻ ഉദ്യോഗസ്ഥർക്കും ഹോം ഗാർഡ്സ് കമാൻഡന്റിനും ബസ്തർ കളക്ടർ കർശന നിർദ്ദേശം നൽകി.
