നോയിഡ: യമുനാ എക്സ്പ്രസ്‌വേയിൽ യാത്രാബസിന് തീപിടിച്ച് ഒമ്പത് പേർ ദാരുണമായി മരണപ്പെട്ടു. ബുധനാഴ്ച രാത്രി ഡൽഹിയിൽ നിന്ന് മഹോബയിലേക്ക് സർവീസ് നടത്തുകയായിരുന്ന സ്വകാര്യ ബസാണ് അപകടത്തിൽപ്പെട്ടത്. പൊള്ളലേറ്റ നിരവധി യാത്രക്കാരെ ജേവാറിലുള്ള കൈലാഷ് ആശുപത്രിയിൽ പ്രവേശിപ്പിച്ചതായി അധികൃതർ വ്യക്തമാക്കി.

യമുനാ എക്സ്പ്രസ്‌വേയിലെ 33-ാം കിലോമീറ്ററിൽ രാത്രി ഏകദേശം 11.30-ഓടെയായിരുന്നു നാടിനെ നടുക്കിയ ദുരന്തം. രാജ് കൽപ്പന ട്രാവൽസിന്റെ ഉടമസ്ഥതയിലുള്ള ബസാണ് അഗ്നിക്കിരയായത്. വാഹനത്തിൽ മുപ്പത്തിയഞ്ചോളം യാത്രക്കാരുണ്ടായിരുന്നുവെന്ന് ഹാമിർപൂർ സ്വദേശിയായ സുനിൽ കുമാർ പോലീസിന് നൽകിയ മൊഴിയിൽ വ്യക്തമാക്കി.

ഡ്രൈവറുടെ ക്യാബിന്റെ ഭാഗത്തുനിന്ന് എന്തോ കരിയുന്ന മണം അനുഭവപ്പെട്ടതായി യാത്രക്കാർ നേരത്തെ മുന്നറിയിപ്പ് നൽകിയിരുന്നു. എന്നാൽ യാത്രക്കാർ വിവരം ധരിപ്പിച്ചിട്ടും വാഹനം നിർത്തി പരിശോധിക്കാനോ ഗന്ധത്തിന്റെ കാരണം കണ്ടെത്താനോ ഡ്രൈവറും കണ്ടക്ടറും തയ്യാറായില്ലെന്നാണ് ലഭിക്കുന്ന വിവരം.

ഇതിന് തൊട്ടുപിന്നാലെ ഡ്രൈവർ സീറ്റിന്റെ വശത്തുനിന്ന് തീ ആളിപ്പടരുകയും നിമിഷങ്ങൾക്കകം ബസിനുള്ളിലേക്ക് പടർന്നുപിടിക്കുകയുമായിരുന്നു. രാത്രിയിലെ സമയമായതിനാൽ ഭൂരിഭാഗം പേരും നല്ല ഉറക്കത്തിലായിരുന്നു. ജനൽച്ചില്ലുകൾ തകർത്താണ് ചിലർ പുറത്തേക്ക് ചാടി ജീവൻ രക്ഷിച്ചത്. സംഭവത്തിൽ യാത്രക്കാരുടെ പരാതിയിൽ കേസ് രജിസ്റ്റർ ചെയ്ത് പോലീസ് അന്വേഷണം തുടങ്ങിയിട്ടുണ്ട്.