ന്യൂഡൽഹി: രാജ്യത്ത് വിവിധ സംസ്ഥാനങ്ങളിലായി നടന്ന നിയമസഭാ തെരഞ്ഞെടുപ്പുകൾക്കായി ബി.ജെ.പി ആകെ 529 കോടി രൂപ വിനിയോഗിച്ചതായി റിപ്പോർട്ട്. ഈ തുകയുടെ പകുതിയിലധികവും ചെലവായത് പശ്ചിമ ബംഗാളിലാണ്; 286 കോടി രൂപയാണ് ഇവിടെ പാർട്ടി ഇറക്കിയത്. പശ്ചിമ ബംഗാളിന് പിന്നാലെ അസമിൽ 96 കോടി രൂപയും കേരളത്തിൽ 83 കോടി രൂപയും തമിഴ്നാട്ടിൽ 52 കോടി രൂപയും പുതുച്ചേരിയിൽ 12 കോടി രൂപയുമാണ് പാർട്ടി ചെലവഴിച്ചത്. തെരഞ്ഞെടുപ്പ് കാലയളവിൽ 1494 കോടി രൂപ സംഭാവനയായി ബി.ജെ.പിക്ക് ലഭിച്ചിരുന്നു. തെരഞ്ഞെടുപ്പ് കമ്മീഷന് ബി.ജെ.പി കൈമാറിയ ഔദ്യോഗിക ചെലവ് കണക്കുകളിലാണ് ഇക്കാര്യങ്ങൾ വ്യക്തമാക്കുന്നത്. ഈ 1,494 കോടി രൂപ കൈപ്പറ്റിയതിന് പിന്നാലെ പാർട്ടിയുടെ ബാങ്ക് അക്കൗണ്ടിലുള്ള നീക്കിയിരുപ്പ് 7,689.06 കോടി രൂപയായിരുന്നുവെന്നും സമർപ്പിച്ച രേഖകൾ സൂചിപ്പിക്കുന്നു.

പശ്ചിമ ബംഗാളിൽ ആദ്യമായി പാർട്ടി ഭരണം പിടിച്ച തെരഞ്ഞെടുപ്പിൽ ബി.ജെ.പിയുടെ പൊതുവായ പ്രചാരണ പരിപാടികൾക്കായി 217.16 കോടി രൂപയും സ്ഥാനാർത്ഥികൾക്കായി 69.83 കോടി രൂപയുമാണ് വിനിയോഗിച്ചത്. സ്ഥാനാർത്ഥികൾക്ക് നേരിട്ട് നൽകിയ 58.80 കോടി രൂപയും ഇതിൽ ഉൾപ്പെടുന്നു. കൂടാതെ, അസമിൽ 96.26 കോടി രൂപയും കേരളത്തിൽ 82.67 കോടി രൂപയും തമിഴ്നാട്ടിൽ 51.56 കോടി രൂപയും പുതുച്ചേരിയിൽ 11.89 കോടി രൂപയും ചെലവിട്ടതായും കണക്കുകൾ വിശദമാക്കുന്നു.

മത്സരിക്കുന്ന ഓരോ സ്ഥാനാർത്ഥിക്കും വിനിയോഗിക്കാവുന്ന തുകയ്ക്ക് നിയമപരമായ പരിധിയുണ്ടെങ്കിലും രാഷ്ട്രീയ പാർട്ടികൾക്ക് തെരഞ്ഞെടുപ്പുകളിൽ ചെലവഴിക്കാൻ പരിധി നിശ്ചയിച്ചിട്ടില്ല. എങ്കിലും, യാത്രകൾ, പൊതുറാലികൾ, മാധ്യമ പരസ്യങ്ങൾ, പ്രചാരണ സാമഗ്രികൾ എന്നിവയ്ക്കായുള്ള മുഴുവൻ ചെലവുകളുടെയും കൃത്യമായ കണക്കുകൾ തെരഞ്ഞെടുപ്പ് പൂർത്തിയായ ശേഷം എല്ലാ പാർട്ടികളും തെരഞ്ഞെടുപ്പ് കമ്മീഷന് സമർപ്പിക്കേണ്ടതുണ്ട്.