അഹമ്മദാബാദ്: പ്രധാനമന്ത്രി നരേന്ദ്ര മോദിയുടെ പിറന്നാൾ ദിനമായ സെപ്റ്റംബർ 17-ന് കോലം കത്തിച്ച് പ്രതിഷേധിച്ച 21 കർഷകർക്കെതിരെ ഗുജറാത്ത് പോലീസ് കേസെടുത്തു. മോർബി ജില്ലയിലെ ജെറ്റ്പാറിൽ അദാനി എനർജി സൊല്യൂഷൻസ് ലിമിറ്റഡിന്റെ ഉയർന്ന ശേഷിയുള്ള വൈദ്യുത ലൈനുകൾ വലിക്കുന്നതിനെതിരെ കർഷകർ സംഘടിപ്പിച്ച സമരത്തിനിടയിലായിരുന്നു പ്രധാനമന്ത്രിയുടെ കോലം അഗ്നിക്കിരയാക്കിയത്. പ്രധാനമന്ത്രിക്ക് പുറമെ കേന്ദ്ര ആഭ്യന്തര വകുപ്പ് മന്ത്രി അമിത് ഷായുടെ കോലവും കർഷകർ കത്തിച്ചിരുന്നു. ഗതാഗത തടസ്സം സൃഷ്ടിക്കൽ, ക്രിമിനൽ ഗൂഢാലോചന, നിയമവിരുദ്ധമായി സംഘം ചേരൽ എന്നീ വകുപ്പുകൾ ചുമത്തിയാണ് പോലീസ് കേസെടുത്തത്. മോർബി ഇൻസ്പെക്ടർ നിലേഷ് എസ്. ഘേടിയ നൽകിയ പരാതിയുടെ അടിസ്ഥാനത്തിലാണ് സമരക്കാർക്കെതിരെ നിയമനടപടി സ്വീകരിച്ചിരിക്കുന്നത്.
അതേസമയം, പ്രധാനമന്ത്രിയുടെ ജന്മദിനത്തിൽ അദ്ദേഹത്തിന്റെ കോലം കത്തിച്ച സംഭവത്തിൽ ഉത്തർപ്രദേശിലും 15 പേർക്കെതിരെ പോലീസ് കേസ് രജിസ്റ്റർ ചെയ്തു. രാജ്യത്ത് വർദ്ധിച്ചുവരുന്ന തൊഴിലില്ലായ്മയ്ക്കെതിരെയായിരുന്നു യു.പിയിലെ സമരം. ജിൻജാന പോലീസ് സ്റ്റേഷൻ പരിധിയിൽ വരുന്ന ദർഗാപൂർ ഗ്രാമത്തിലാണ് സംഭവം അരങ്ങേറിയത്. സംഘടനയുടെ ദേശീയ അധ്യക്ഷൻ ഉൾപ്പെടെയുള്ളവർക്കെതിരെയാണ് കേസ്. ഷാംലി ജില്ലാ ബി.ജെ.പി പ്രസിഡന്റ് സത്യേന്ദ്ര തോമർ നൽകിയ പരാതിയെത്തുടർന്ന്, കണ്ടാലറിയാവുന്ന 11 പേർ ഉൾപ്പെടെ ആകെ 15 പേർക്കെതിരെ പോലീസ് കേസെടുക്കുകയായിരുന്നു. ഭാരതീയ സമാജ് രക്ഷക് യുവ മോർച്ച ദേശീയ പ്രസിഡന്റ് പ്രിൻസ് കോരി അടക്കമുള്ളവർക്കെതിരെ കലാപം ഉണ്ടാക്കൽ (ഐ.പി.സി 147), സർക്കാർ ഉദ്യോഗസ്ഥന്റെ നിയമപരമായ ഉത്തരവുകൾ ലംഘിക്കൽ (ഐ.പി.സി 188) തുടങ്ങിയ വകുപ്പുകൾ പ്രകാരമാണ് കേസെടുത്തിട്ടുള്ളത്.
