ന്യൂഡൽഹി: രാജ്യത്ത് പ്രമുഖ കമ്പനിയായ ഐ.ടി.സിയുടെ സിഗരറ്റ് ഉൽപ്പന്നങ്ങൾക്ക് വീണ്ടും വില കുതിച്ചുയരുന്നു. 20 എണ്ണമടങ്ങിയ ക്ലാസിക് കണക്ട് പാക്കറ്റിന് 38 രൂപ വർദ്ധിച്ചതോടെ നിരക്ക് 390 രൂപയിൽ നിന്നും 428 രൂപയായി ഉയർന്നു. 10 എണ്ണമുള്ള ഗോൾഡ് ഫ്ലേക്ക് സൂപ്പർ സ്റ്റാറിന് 10 രൂപയാണ് കൂട്ടിയത്; ഇതോടെ ഇതിന്റെ വില 79 രൂപയിൽ നിന്ന് 89 രൂപയിലെത്തി.
പ്രധാനപ്പെട്ട ചില ബ്രാൻഡുകളുടെ പരമാവധി ചില്ലറ വിൽപന വിലയിലാണ് (എം.ആർ.പി) ഐ.ടി.സി വർദ്ധനവ് വരുത്തിയിരിക്കുന്നതെന്ന് വ്യാപാരികൾ വ്യക്തമാക്കുന്നു. പുതിയ വില രേഖപ്പെടുത്തിയ ഉൽപ്പന്നങ്ങൾ ഇതിനകം തന്നെ വിപണിയിലെത്തിയിട്ടുണ്ട്. പുകയില ഉൽപ്പന്നങ്ങളുടെ നികുതി ഘടനയിലുണ്ടായ പരിഷ്കരണങ്ങളെത്തുടർന്ന് നിർമ്മാതാക്കൾ നടത്തിയ നിരക്ക് പുനഃക്രമീകരണത്തിന്റെ ഭാഗമായി, ഈ വർഷം തന്നെ കമ്പനി പല ഘട്ടങ്ങളിലായി വില ഉയർത്തിയതിന് പിന്നാലെയാണ് പുതിയ നിരക്കുവർദ്ധനവും പ്രാബല്യത്തിലാകുന്നത്.
കഴിഞ്ഞ ഫെബ്രുവരി ഒന്ന് മുതൽ സിഗരറ്റുകൾ അടക്കമുള്ള പുകയില ഉൽപ്പന്നങ്ങൾ 40 ശതമാനം ജി.എസ്.ടി പരിധിയിലാണ് ഉൾപ്പെടുത്തിയിട്ടുള്ളത്. ഇതിനുപുറമെ പ്രത്യേക അധിക എക്സൈസ് തീരുവയും സർക്കാർ ഏർപ്പെടുത്തിയിരുന്നു. സിഗരറ്റുകളുടെ വലിപ്പവും ഫിൽട്ടറിന്റെ സാന്നിധ്യവും അടിസ്ഥാനമാക്കി 1,000 എണ്ണത്തിന് 2,050 രൂപ മുതൽ 8,500 രൂപ വരെയാണ് ഈ അധിക തീരുവ നിശ്ചയിച്ചിരിക്കുന്നത്. 40 ശതമാനം വരുന്ന ഉയർന്ന ജി.എസ്.ടിക്ക് മേലെയാണ് ഈ അധിക നികുതിയും ഈടാക്കുന്നത്. ഇതോടെ മൊത്തത്തിലുള്ള നികുതിഭാരം വർദ്ധിക്കുകയും എല്ലാ വിഭാഗത്തിലുമുള്ള സിഗരറ്റുകളുടെയും ചില്ലറ നിരക്കുകൾ കുതിച്ചുയരുകയുമായിരുന്നു. ഉയർന്ന നികുതിച്ചെലവ് നിർമ്മാതാക്കൾ നേരിട്ട് ഉപഭോക്താക്കളുടെ ചുമലിലേക്ക് മാറ്റിയതോടെ നീളമേറിയതും ഫിൽട്ടറുള്ളതുമായ പ്രീമിയം സിഗരറ്റുകൾക്കാണ് ഏറ്റവും വലിയ വിലക്കയറ്റം ഉണ്ടായത്.
ഫെബ്രുവരി മാസത്തിൽ 'ക്ലാസിക് കണക്ട്' നിരക്ക് 300 രൂപയിൽ നിന്ന് ഘട്ടങ്ങളായി 360 ലേക്കും തുടർന്ന് 390 രൂപയിലേക്കും കമ്പനി കൂട്ടിയിരുന്നു. അതേ ഘട്ടത്തിൽ 'ഗോൾഡ് ഫ്ലേക്ക് സൂപ്പർ സ്റ്റാർ' വില 59 രൂപയിൽ നിന്നും 70 രൂപയിലേക്കും ഉയർന്നു. പുതിയ നികുതി വ്യവസ്ഥയുടെ ആഘാതം ഏറ്റവും കൂടുതൽ പ്രതിഫലിച്ചത് 'ക്ലാസിക്', 'ഗോൾഡ് ഫ്ലേക്ക് കിംഗ്സ്', 'മാർൽബോറോ' തുടങ്ങിയ കിംഗ്-സൈസ് വിഭാഗങ്ങളിലാണ്. ഈ വിഭാഗത്തിൽ മുൻപ് 20 രൂപ നിരക്കിൽ ലഭിച്ചിരുന്ന ഒറ്റ സിഗരറ്റിന്റെ വില നിലവിൽ 25 മുതൽ 28 രൂപ വരെയായി ഉയർന്നതായാണ് വിപണി റിപ്പോർട്ടുകൾ സൂചിപ്പിക്കുന്നത്.
