ന്യൂഡൽഹി: സ്വാതന്ത്ര്യദിന പ്രസംഗത്തിനിടെ പ്രധാനമന്ത്രി നരേന്ദ്ര മോദി നടത്തിയ 'ദിമാഗി നക്‌സൽ' എന്ന പ്രയോഗത്തിന് തൊട്ടുപിന്നാലെ രൂപംകൊണ്ട 'ദിമാഗി നക്‌സൽ പാർട്ടി' എന്ന ഇൻസ്റ്റഗ്രാം പേജ് ഒറ്റദിവസം കൊണ്ട് സ്വന്തമാക്കിയത് 2.6 ലക്ഷത്തിലധികം ഫോളോവേഴ്സിനെ. മാവോയിസ്റ്റുകൾക്കെതിരെ കേന്ദ്ര സർക്കാർ നടത്തുന്ന പോരാട്ടങ്ങളെയും കൈവരിച്ച നേട്ടങ്ങളെയും കുറിച്ച് വിശദീകരിക്കുന്നതിനിടയിലായിരുന്നു പ്രധാനമന്ത്രി ഈ പരാമർശം നടത്തിയത്.

ഈ ഇൻസ്റ്റഗ്രാം അക്കൗണ്ട് കൈകാര്യം ചെയ്യുന്നത് ആരാണെന്നത് സംബന്ധിച്ച് വ്യക്തത വന്നിട്ടില്ല. ആകെ 62 പോസ്റ്റുകൾ പങ്കുവെച്ചിട്ടുള്ള ഈ അക്കൗണ്ട് ഏകദേശം 35 പേരെയാണ് ഫോളോ ചെയ്യുന്നത്. കോൺഗ്രസ് നേതാവും ലോക്‌സഭാ പ്രതിപക്ഷ നേതാവുമായ രാഹുൽ ഗാന്ധി, സമാജ്‌വാദി പാർട്ടി അധ്യക്ഷൻ അഖിലേഷ് യാദവ്, ആം ആദ്മി പാർട്ടി നേതാവ് അരവിന്ദ് കെജ്‌രിവാൾ, യൂട്യൂബർ ധ്രുവ് റാത്തി, ഹാസ്യകലാകാരൻ കുനാൽ കാംറ, നടൻ പ്രകാശ് രാജ്, ഫാക്ട് ചെക്കർ മുഹമ്മദ് സുബൈർ തുടങ്ങിയ പ്രമുഖരാണ് ഈ അക്കൗണ്ടിന്റെ ഫോളോയിംഗ് പട്ടികയിലുള്ളത്.