മാർവെൽ സിനിമാറ്റിക് യൂണിവേഴ്സിന് ലോകവ്യാപകമായി വലിയൊരു ആരാധകവൃന്ദമാണുള്ളത്. മാർവെൽ ബാനറിൽ പുറത്തുവരുന്ന ഓരോ ചിത്രങ്ങൾക്കും ആവേശകരമായ സ്വീകാര്യതയാണ് ലഭിക്കാറുള്ളത്. കഴിഞ്ഞ കുറെ നാളുകളായി പ്രതീക്ഷയ്ക്കൊത്ത ചിത്രങ്ങൾ നൽകാൻ മാർവെൽ സ്റ്റുഡിയോസിന് സാധിച്ചിട്ടില്ലെങ്കിലും, അവരുടെ ശക്തമായ തിരിച്ചുവരവിനായി കാത്തിരിക്കുകയാണ് സിനിമാപ്രേമികൾ. ഈ സാഹചര്യത്തിൽ മാർവെലിന്റെ ഏറ്റവും പ്രതീക്ഷയേറിയ ചിത്രങ്ങളിലൊന്നായ 'സ്പൈഡർമാൻ: ബ്രാൻഡ് ന്യൂ ഡേ' ഇന്ത്യയിൽ മികച്ച പ്രാരംഭ വിജയം ഉറപ്പാക്കുമെന്നാണ് കണക്കുകൾ സൂചിപ്പിക്കുന്നത്.
റിലീസിന് മൂന്ന് ദിവസം ബാക്കിനിൽക്കെ, അഡ്വാൻസ് ബുക്കിംഗിലൂടെ മാത്രം ചിത്രം ഇന്ത്യയിൽ നിന്ന് 50 കോടി രൂപയിലധികം കളക്ഷൻ നേടിയെന്നാണ് പുറത്തുവരുന്ന റിപ്പോർട്ടുകൾ. ഇതോടെ, ഒരു ഹോളിവുഡ് ചിത്രം ആദ്യ ദിവസം അഡ്വാൻസ് ടിക്കറ്റ് വിൽപ്പനയിലൂടെ നേടുന്ന ഏറ്റവും ഉയർന്ന രണ്ടാമത്തെ കളക്ഷനായി ഇത് മാറി. ഈ പട്ടികയിൽ അവഞ്ചേഴ്സ്: എൻഡ് ഗെയിം ആണ് ഒന്നാം സ്ഥാനത്ത് നിലനിൽക്കുന്നത്. ആഗോള റിലീസിന് ഒരു ദിവസം മുൻപ് ചിത്രം ഇന്ത്യയിൽ തിയറ്ററുകളിലെത്തുമെന്ന് നിർമാതാക്കളായ സോണി പിക്ചേഴ്സ് നേരത്തെ ഔദ്യോഗികമായി അറിയിച്ചിരുന്നു.
ജൂലൈ 31-നാണ് സിനിമയുടെ ആഗോള റിലീസ് എങ്കിൽ, ഇന്ത്യയിൽ ജൂലൈ 30-ന് ചിത്രം പ്രദർശനം ആരംഭിക്കും. മാർവെൽ സിനിമാറ്റിക് യൂണിവേഴ്സിന്റെ 38-ാമത്തെ ചിത്രവും, എം.സി.യു സ്പൈഡർമാൻ പരമ്പരയിലെ നാലാമത്തെ ചിത്രവുമാണിത്. 2021-ൽ പുറത്തിറങ്ങിയ 'സ്പൈഡർമാൻ: നോ വേ ഹോം' എന്ന സിനിമയുടെ നേരിട്ടുള്ള തുടർച്ചയായാണ് 'ബ്രാൻഡ് ന്യൂ ഡേ' എത്തുന്നത്. പ്രശസ്തമായ 'സ്ട്രെയിഞ്ചർ തിങ്സ്' പരമ്പരയിലൂടെ ശ്രദ്ധ നേടിയ സാഡി സിങ്കും ഈ ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
