മലയാളികളുടെ പ്രിയങ്കരനായ താരം ദുൽഖർ സൽമാന്റെ ജന്മദിനത്തിൽ ആരാധകർക്കായി വലിയ സമ്മാനങ്ങൾ. ഓണം റിലീസായി തീയേറ്ററുകളിലെത്തുന്ന 'ഐ ആം ഗെയിം' ഉൾപ്പെടെയുള്ള മൂന്ന് ചിത്രങ്ങളുടെ വിശേഷങ്ങളാണ് താരത്തിന്റെ പിറന്നാൾ ദിനത്തിൽ പുറത്തുവരുന്നത്.
നവാഗതനായ രവി നെലകുടിറ്റി സംവിധാനം ചെയ്ത് എസ്.എൽ.വി സിനിമാസ് നിർമിക്കുന്ന 'ശ്രീ ശ്രീ' എന്ന ചിത്രമാണ് ഇതിലൊന്ന്. പൂജ ഹെഗ്ഡെ നായികയായെത്തുന്ന ഈ റൊമാന്റിക് ഡ്രാമ ചിത്രത്തിന്റെ ആദ്യ ഗാനം ഇന്ന് വൈകുന്നേരം 5 മണിക്ക് റിലീസ് ചെയ്യും. ജി.വി. പ്രകാശ് കുമാറാണ് ചിത്രത്തിന് സംഗീതം ഒരുക്കുന്നത്. ഈ വർഷം ഡിസംബറിൽ ചിത്രം പ്രദർശനത്തിനെത്തും. ദുൽഖറും പൂജ ഹെഗ്ഡെയും ആദ്യമായി ഒന്നിക്കുന്ന ഈ സിനിമയുടെ രചന നിർവഹിച്ചിരിക്കുന്നത് സംവിധായകൻ രവി നെലകുടിറ്റി തന്നെയാണ്. ദീക്ഷിത് ഷെട്ടിയാണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്.
മലയാളികൾ ഏറെ ആകാംക്ഷയോടെ കാത്തിരിക്കുന്ന 'ഐ ആം ഗെയിം' എന്ന ചിത്രത്തിന്റെ പുതിയ അപ്ഡേറ്റും പിറന്നാൾ ദിനത്തിൽ പുറത്തുവരും. ചിത്രത്തിലെ ആദ്യ ഗാനം പുറത്തിറങ്ങുമെന്നായിരുന്നു നേരത്തെ വന്ന റിപ്പോർട്ടുകൾ എങ്കിലും, സോഷ്യൽ മീഡിയ ട്രാക്കർമാരുടെ പുതിയ വിവരമനുസരിച്ച് സിനിമയുടെ ടീസറാണ് റിലീസ് ചെയ്യുന്നത്. ആഗസ്റ്റ് 20-നാണ് ചിത്രം തിയേറ്ററുകളിലെത്തുന്നത്. തെക്കേ ഇന്ത്യയിലെ നൂറിലധികം ലൊക്കേഷനുകളിലായി ചിത്രീകരണം പൂർത്തിയാക്കിയ ഈ ചിത്രം സംവിധാനം ചെയ്തിരിക്കുന്നത് നഹാസ് ഹിദായത്താണ്. ദുൽഖറിന്റെ കരിയറിലെ തന്നെ ഏറ്റവും വലിയ ചിത്രമായാണ് 'ഐ ആം ഗെയിം' ഒരുങ്ങുന്നത്. വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്ന് നിർമിക്കുന്ന ചിത്രത്തിന്റെ തിരക്കഥ രചിച്ചിരിക്കുന്നത് ഷഹബാസ് റഷീദും ആദർശ് സുകുമാരനും ചേർന്നാണ്.
