ബെയ്ജിങ്: തായ്‌വാനെ ചൈനയോട് കൂട്ടിച്ചേർക്കുകയെന്നത് കമ്മ്യൂണിസ്റ്റ് പാർട്ടിയുടെ ചരിത്രപരമായ ദൗത്യമാണെന്നും, ആ പുനരേകീകരണം ആർക്കും തടയാനാകില്ലെന്നും ചൈനീസ് പ്രസിഡന്റ് ഷി ജിൻപിങ്. ചൈനീസ് വിപ്ലവ നേതാവ് സൺ യാറ്റ്-സെന്നിന്റെ 160-ാം ജന്മവാർഷികത്തോടനുബന്ധിച്ച് ബെയ്ജിങ്ങിലെ ഗ്രേറ്റ് ഹാൾ ഓഫ് ദി പീപ്പിളിൽ നടന്ന ചടങ്ങിൽ സംസാരിക്കുകയായിരുന്നു അദ്ദേഹം.
തായ്‌വാന് പൂർണ്ണ സ്വാതന്ത്ര്യം എന്ന ആശയം പൂർണ്ണമായും തള്ളിക്കളഞ്ഞ ഷി, വിഘടനവാദ പ്രവർത്തനങ്ങൾക്ക് യാതൊരു ഇടവും നൽകില്ലെന്ന് കർശന മുന്നറിയിപ്പ് നൽകി. 'ഒരു ചൈന' എന്ന തത്വവും 1992-ലെ ധാരണയും അംഗീകരിക്കാൻ തയ്യാറായാൽ 'ഒരു രാജ്യം, രണ്ട് വ്യവസ്ഥകൾ' എന്ന നയത്തിലൂന്നി സമാധാനപരമായ ചർച്ചകൾക്ക് ബെയ്ജിങ് ഒരുക്കമാണെന്നും, തായ്‌വാനിലെ ജനങ്ങളുടെ വികാരങ്ങളും താല്പര്യങ്ങളും ചൈന പരിഗണിക്കുമെന്നും അദ്ദേഹം വ്യക്തമാക്കി.
ചരിത്രത്തിന്റെ ഒഴുക്ക് തടയാൻ ആർക്കുമാകില്ലെന്നും മാതൃരാജ്യത്തിന്റെ പൂർണ്ണമായ ഏകീകരണം ചൈനീസ് ജനതയുടെ ആഗ്രഹമാണെന്നും പറഞ്ഞ അദ്ദേഹം, തായ്‌വാൻ കടലിടുക്കിന്റെ ഇരുവശങ്ങളിലുമുള്ളവരും വിദേശത്തുള്ള ചൈനക്കാരും തായ്‌വാൻ സ്വാതന്ത്ര്യവാദികളെ ഒറ്റപ്പെടുത്തണമെന്ന് ആഹ്വാനം ചെയ്തു. 1911-ലെ വിപ്ലവത്തിന് നേതൃത്വം നൽകിയ സൺ യാറ്റ്-സെൻ രാജ്യത്തിന്റെ ഐക്യം കാത്തുസൂക്ഷിച്ച മഹാനായ ദേശസ്നേഹിയാണെന്നും ഷി ജിൻപിങ് അനുസ്മരിച്ചു.
