കൊച്ചി: സ്ത്രീശക്തി ലോട്ടറിയിൽ ഒരേ നമ്പറിലുള്ള രണ്ട് ടിക്കറ്റുകൾ അച്ചടിച്ചുവന്ന സംഭവം പുറത്തുകൊണ്ടുവന്ന രണ്ട് ലോട്ടറി ഏജന്റുമാരുടെ ലൈസൻസ് ഭാഗ്യക്കുറി ഡയറക്ടറേറ്റ് സസ്പെൻഡ് ചെയ്തു. വകുപ്പിന് പൊതുമധ്യത്തിൽ അപകീർത്തിയുണ്ടാക്കി എന്ന് ചൂണ്ടിക്കാട്ടി ബിജു എസ് (ഏജൻസി നമ്പർ Q 4045), സന്തോഷ് ആർ (ഏജൻസി നമ്പർ Q 6112) എന്നിവർക്കെതിരെയാണ് നടപടി. അച്ചടിശാലയുടെയും ലോട്ടറി വകുപ്പിന്റെയും ഗുരുതര വീഴ്ച നിലനിൽക്കെയാണ് ഏജന്റുമാർക്കെതിരെയുള്ള നടപടി.

ലഭിക്കുന്ന ടിക്കറ്റുകളുടെ കൃത്യത ഉറപ്പുവരുത്തേണ്ട ബാധ്യത ഏജന്റിനാണെന്ന് വ്യക്തമാക്കിക്കൊണ്ട് കേരള പേപ്പർ ലോട്ടറി റെഗുലേഷൻ ചട്ടം 5 (5) പ്രകാരമാണ് സംസ്ഥാന ഭാഗ്യക്കുറി ഡയറക്ടർ ഇമ്പശേഖർ എസ് ഉത്തരവിറക്കിയത്. കൊല്ലം ട്രഷറിയിൽ നിന്ന് വിതരണം ചെയ്ത ടിക്കറ്റുകളിലാണ് ക്രമക്കേട് കണ്ടെത്തിയത്.

കൊല്ലം ഡീസന്റ് ജംഗ്ഷനിലെ മീനാക്ഷി ലോട്ടറി ഏജൻസിയിൽ ലഭിച്ച, ഒരു കോടി രൂപ ഒന്നാം സമ്മാനമുള്ള സ്ത്രീശക്തി ലോട്ടറിയുടെ എസ്‌സി 819746 എന്ന നമ്പറിലാണ് ഒരേപോലുള്ള രണ്ട് ടിക്കറ്റുകൾ കണ്ടത്. ഇതിന് സമാനമായി കുണ്ടറ ചെറുമൂടുള്ള അഖി ലോട്ടറി ഏജൻസിയിലും ഒരേ നമ്പറിലുള്ള രണ്ട് സ്ത്രീശക്തി ലോട്ടറി ടിക്കറ്റുകൾ ശ്രദ്ധയിൽപ്പെട്ടിരുന്നു.