വയനാട്: പഠനയാത്രയുമായി ബന്ധപ്പെട്ട് സർക്കാർ മാർഗ്ഗനിർദ്ദേശങ്ങൾ ലംഘിച്ചെന്ന കണ്ടെത്തലിൽ മീനങ്ങാടി ഗവ. ഹയർ സെക്കൻഡറി സ്കൂൾ പ്രിൻസിപ്പൽ ഷിവി കൃഷ്ണനെ വിദ്യാഭ്യാസ വകുപ്പ് വടുവഞ്ചാൽ ജിഎച്ച്എസ്എസിലേക്ക് സ്ഥലം മാറ്റി. സ്കൂളിലെ പിടിഎ പ്രസിഡന്റിനെ സ്ഥാനത്തുനിന്ന് നീക്കാനും തീരുമാനമായിട്ടുണ്ട്. ആർആർഡിയിൽ നിന്ന് മുൻകൂർ അനുമതി വാങ്ങിയില്ലെന്നും മൂന്ന് ദിവസത്തെ യാത്ര അഞ്ച് ദിവസമാക്കി നീട്ടിയെന്നുമുള്ള കണ്ടെത്തലുകളുടെ പശ്ചാത്തലത്തിൽ, സംഭവത്തിൽ വിശദമായ അന്വേഷണം നടത്താൻ പൊതുവിദ്യാഭ്യാസ ഡെപ്യൂട്ടി സെക്രട്ടറിയെ ചുമതലപ്പെടുത്തി.
വിനോദയാത്രയ്ക്കിടെ പ്രിൻസിപ്പൽ മദ്യപിച്ചതായി വിദ്യാർത്ഥികൾ ആരോപണം ഉന്നയിച്ചതോടെയാണ് സംഭവം വലിയ വിവാദമായത്. എന്നാൽ രക്തപരിശോധനാ ഫലം നെഗറ്റീവായതോടെ ആരോപണങ്ങൾ അടിസ്ഥാനരഹിതമാണെന്ന് തെളിഞ്ഞിരുന്നു. തനിക്കെതിരെ പോലീസിൽ പരാതികളൊന്നുമില്ലെന്നും കുട്ടികളുടെ അപക്വമായ പെരുമാറ്റത്തെ കുറ്റപ്പെടുത്തുന്നില്ലെന്നും വ്യക്തമാക്കിയ ഷിവി കൃഷ്ണൻ, തന്റെ നിരപരാധിത്വം തെളിയിക്കാൻ സ്വമേധയാ പരിശോധനയ്ക്ക് തയ്യാറാവുകയായിരുന്നുവെന്ന് അറിയിച്ചു.
സ്ഥലത്തെത്തിയവരിൽ ഒരാളൊഴികെ മറ്റാരും യഥാർത്ഥ രക്ഷിതാക്കളായിരുന്നില്ലെന്നും, യൂറിൻ ടെസ്റ്റ് നടത്തണമെന്ന് ആവശ്യപ്പെട്ടത് ഒരു രാഷ്ട്രീയ പ്രവർത്തകനാണെന്നും പ്രിൻസിപ്പൽ വെളിപ്പെടുത്തി. പിടിഎ തെരഞ്ഞെടുപ്പുമായി ബന്ധപ്പെട്ട തർക്കങ്ങൾ ഇതിനായി രാഷ്ട്രീയമായി ദുരുപയോഗിക്കുകയായിരുന്നുവെന്നും തനിക്കും കുടുംബത്തിനുമുണ്ടായ കടുത്ത മാനസിക വിഷമങ്ങൾക്ക് കാരണക്കാരായവർക്കെതിരെ നിയമനടപടി സ്വീകരിക്കുമെന്നും അദ്ദേഹം കൂട്ടിച്ചേർത്തു.
