തിരുവനന്തപുരം: സമൂഹമാധ്യമങ്ങളിലൂടെ സ്ത്രീകൾക്കെതിരെ നടക്കുന്ന സൈബർ അതിക്രമങ്ങൾ തടയാൻ കർശന നടപടികൾ സ്വീകരിക്കുമെന്നും ഇതിനായി പ്രത്യേക നിയമനിർമ്മാണം സർക്കാരിന്റെ പരിഗണനയിലാണെന്നും മുഖ്യമന്ത്രി വി.ഡി. സതീശൻ. മുൻപ് ട്രെയിനുകളിലും പൊതുശൗചാലയങ്ങളിലും കാണപ്പെട്ടിരുന്ന തരത്തിലുള്ള അശ്ലീല എഴുത്തുകൾ ഇപ്പോൾ സമൂഹമാധ്യമങ്ങളിലേക്ക് മാറിയിരിക്കുകയാണെന്നും, അവിടെ സ്ത്രീകളാണ് പ്രധാനമായും ലക്ഷ്യമിടപ്പെടുന്നതെന്നും അദ്ദേഹം ചൂണ്ടിക്കാട്ടി. തലസ്ഥാനത്ത് സ്ത്രീശാക്തീകരണം ലക്ഷ്യമിട്ട് സംഘടിപ്പിച്ച 'മകൾക്കൊപ്പം' പദ്ധതിയുടെ വനിതാ നയ സമ്മിറ്റ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജ്യത്തിന് തന്നെ മാതൃകയാകുന്ന വിധത്തിൽ പുതിയ കാലഘട്ടത്തിനനുസരിച്ചുള്ള വനിതാ നയം രൂപീകരിക്കുമെന്നും അത് ശക്തമായ ഇച്ഛാശക്തിയോടെ സർക്കാർ നടപ്പിലാക്കുമെന്നും മുഖ്യമന്ത്രി വ്യക്തമാക്കി. വസ്ത്രധാരണത്തിൽ മാറ്റങ്ങൾ വരുന്നുണ്ടെങ്കിലും പലരുടെയും ചിന്താഗതികൾ ഇപ്പോഴും മാറിയിട്ടില്ലെന്ന് അദ്ദേഹം നിരീക്ഷിച്ചു.
സ്ത്രീകൾക്ക് സാമ്പത്തിക സ്വയംപര്യാപ്തതയ്ക്കൊപ്പം സമൂഹത്തിൽ തലയുയർത്തി നിൽക്കാനുള്ള ആത്മവിശ്വാസവും അനിവാര്യമാണ്. സാമ്പത്തികമായും സാമൂഹികമായും സ്ത്രീകളെ മുഖ്യധാരയിൽ എത്തിക്കുക എന്ന ലക്ഷ്യത്തോടെ വിട്ടുവീഴ്ചയില്ലാത്ത വനിതാ നയമായിരിക്കും കേരളം നടപ്പിലാക്കുകയെന്നും അദ്ദേഹം കൂട്ടിച്ചേർത്തു.
