കൊച്ചി: കാലടി ശ്രീശങ്കരാചാര്യ സംസ്കൃത സർവകലാശാലയിൽ സസ്പെൻഷനിലുള്ള വിദ്യാർത്ഥികളെ പരീക്ഷയെഴുതാൻ അനുവദിച്ച ഹൈക്കോടതി സിംഗിൾ ബെഞ്ച് വിധിക്കെതിരെ വൈസ് ചാൻസലർ സിസ തോമസ് ഡിവിഷൻ ബെഞ്ചിനെ സമീപിച്ചു. സസ്പെൻഷൻ നടപടി നേരിടുന്ന വിദ്യാർത്ഥികൾക്ക് ആവശ്യമായ ഹാജരില്ലാത്തതിനാൽ പരീക്ഷയെഴുതാൻ അനുവദിക്കാനാകില്ലെന്നാണ് അപ്പീലിൽ വിസി ഉന്നയിച്ചിരിക്കുന്ന പ്രധാന വാദം. സ്വന്തം വിദ്യാർത്ഥികൾ പരീക്ഷയെഴുതുന്നത് തടയാനായി സർവകലാശാല തന്നെ കോടതിയെ സമീപിക്കുന്നത് ചരിത്രത്തിലാദ്യമാണ്.
അതിനിടെ, അനുകൂല കോടതി ഉത്തരവുണ്ടായിട്ടും പരീക്ഷാ രജിസ്ട്രേഷന് അനുവദിക്കാത്ത സർവകലാശാലാ നിലപാടിനെതിരെ വിദ്യാർത്ഥികൾ പോലീസിൽ പരാതി നൽകി. പരീക്ഷാ രജിസ്ട്രേഷനായി ഇന്നലെ വെബ്സൈറ്റ് ലഭ്യമാക്കണമെന്നായിരുന്നു ഹൈക്കോടതി നിർദ്ദേശിച്ചിരുന്നത്; രാവിലെ 11:30-ന് സൈറ്റ് തുറക്കാമെന്ന് അറിയിച്ചെങ്കിലും വൈകുന്നേരമായിട്ടും ഇതിന് തയ്യാറാകാത്തതിനെതിരെ വലിയ വിമർശനങ്ങളാണ് ഉയരുന്നത്.
വിസിക്കെതിരായ സമരത്തെ തുടർന്ന് വിദ്യാർത്ഥികളെ സസ്പെൻഡ് ചെയ്തിട്ട് 62 ദിവസം പിന്നിട്ടു. കോടതി ഉത്തരവ് തള്ളിക്കളഞ്ഞുകൊണ്ടുള്ള സർവകലാശാലയുടെ നീക്കങ്ങൾ വിദ്യാർത്ഥികളോടുള്ള വ്യക്തിവൈരാഗ്യവും പ്രതികാരവുമാണെന്ന് എസ്എഫ്ഐ ഉൾപ്പെടെയുള്ള സംഘടനകൾ ആരോപിച്ചു.
