കണ്ണൂർ: മുൻ ആരോഗ്യമന്ത്രി വീണാ ജോർജിനെതിരായ കരിങ്കൊടി പ്രതിഷേധത്തിനിടെ കെഎസ്‌യു പ്രവർത്തകർ അവരെ ആക്രമിച്ചിട്ടില്ലെന്ന് വ്യക്തമാക്കി പ്രത്യേക അന്വേഷണ സംഘം ഡിജിപിക്ക് റിപ്പോർട്ട് കൈമാറി. മുൻമന്ത്രിയും അവരുടെ ഗൺമാനും വിഷയം അനാവശ്യമായി പെരുപ്പിച്ചു കാണിക്കുകയായിരുന്നുവെന്നും, പ്രവർത്തകർക്കെതിരെ ക്രിമിനൽ നടപടികൾ ആവശ്യമില്ലെന്നും ശനിയാഴ്ച ഉച്ചയ്ക്ക് സമർപ്പിച്ച റിപ്പോർട്ട് വ്യക്തമാക്കുന്നു.
കരിങ്കൊടിയുമായി എത്തിയ പ്രവർത്തകർക്ക് മന്ത്രിയുടെ സമീപത്തേക്ക് പോലും എത്തുവാൻ കഴിഞ്ഞിരുന്നില്ല. തുടർന്ന് പോലീസും പ്രവർത്തകരും തമ്മിലുണ്ടായ ഉന്തും തള്ളിനുമിടയിൽ പെട്ടാണ് മന്ത്രിക്ക് കഴുത്തിന് വേദനയുണ്ടായതെന്നും, സംഭവത്തിന് ശേഷം അവർ മൂന്നാം പ്ലാറ്റ്‌ഫോമിലേക്ക് നടന്നുപോയിരുന്നുവെന്നും അന്വേഷണത്തിൽ കണ്ടെത്തി. ഗൺമാൻ പിന്നീട് മൊഴി മാറ്റിയതിനാൽ ആക്രമിച്ചെന്ന പേരിലുള്ള ക്രിമിനൽ കേസ് നിലനിൽക്കില്ലെന്നും, വ്യാജമൊഴി നൽകിയ ഇയാൾക്കെതിരെ ഡിജിപിയുടെ വിവേചനാധികാരം ഉപയോഗിച്ച് അച്ചടക്ക നടപടി സ്വീകരിക്കാമെന്നും റിപ്പോർട്ടിലുണ്ട്.
പരിയാരം ഗവൺമെന്റ് മെഡിക്കൽ കോളേജിൽ മന്ത്രിയെ ചികിത്സിച്ച ഡോക്ടർമാരുടെ മൊഴി സംഘം രേഖപ്പെടുത്തിയിട്ടുണ്ട്. സംഭവസ്ഥലത്തുനിന്ന് തൊണ്ടിമുതലായി കരിങ്കൊടി മാത്രമാണ് കണ്ടെടുക്കാൻ കഴിഞ്ഞതെന്നും ആയുധങ്ങളൊന്നും കണ്ടെത്താനായിട്ടില്ലെന്നും വ്യക്തമാക്കിയ റിപ്പോർട്ടിൽ, പ്രവർത്തകർക്കെതിരെ ഗുരുതരമായ വകുപ്പുകൾ ചുമത്താൻ നിർദ്ദേശിച്ചത് ആരാണെന്ന് കണ്ടെത്താൻ സാധിച്ചിട്ടില്ലെന്നും ചൂണ്ടിക്കാട്ടുന്നു.
