പത്തനംതിട്ട: അടൂർ പോലീസ് സ്റ്റേഷനിലെ സംഭവങ്ങളുമായി ബന്ധപ്പെട്ട വിവാദങ്ങളിൽ വിശദീകരണവുമായി കോൺഗ്രസ് നേതാവും ജില്ലാ പഞ്ചായത്തംഗവുമായ ശ്രീനാദേവി കുഞ്ഞമ്മ രംഗത്ത്. താൻ സ്റ്റേഷനിലെ ലോക്കപ്പിനുള്ളിൽ പ്രവേശിച്ചിട്ടില്ലെന്നും പ്രതിയായ രാജൻ ജോസഫിനെ ഭീഷണിപ്പെടുത്തിയിട്ടില്ലെന്നും പത്തനംതിട്ടയിൽ മാധ്യമങ്ങളോട് സംസാരിക്കവെ അവർ വ്യക്തമാക്കി.
തനിക്കെതിരെയും രാഹുൽ മാങ്കൂട്ടത്തിലിനെതിരെയും രാജൻ ജോസഫ് വീഡിയോ ചെയ്തിരുന്നതായും, പരാതിക്കാരി എന്ന നിലയിൽ പ്രതിയെ തിരിച്ചറിയാൻ തനിക്ക് പൂർണ്ണ അവകാശമുണ്ടെന്നും അവർ ചൂണ്ടിക്കാട്ടി. ഒരു ജനപ്രതിനിധി എന്ന നിലയിൽ പൂർണ്ണ സംയമനത്തോടെ 'സുഖമാണോ ചേട്ടാ' എന്ന് മാന്യമായി മാത്രമാണ് ചോദിച്ചതെന്നും യാതൊരുവിധ നെഗറ്റീവ് സംഭാഷണവും ഉണ്ടായിട്ടില്ലെന്നും അവർ പറഞ്ഞു.
സിസിടിവി ദൃശ്യങ്ങളിൽ രാജൻ ജോസഫിനെ ആരും മർദ്ദിക്കുന്നതായി കാണാനില്ലെന്നും പോലീസിന്റെ സംരക്ഷണമുണ്ടെന്ന ധൈര്യത്തിൽ ഇയാൾ അവിടെയുണ്ടായിരുന്നവരെ അസഭ്യം പറയുകയായിരുന്നുവെന്നും ശ്രീനാദേവി കുഞ്ഞമ്മ ആരോപിച്ചു. ഇടത് ഭരണത്തിൽ തനിക്ക് അർഹമായ നിയമസംരക്ഷണം ലഭിച്ചില്ലെന്നും, താൻ മോശമായാണ് പെരുമാറിയതെങ്കിൽ ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥർ തന്നെ തടയുമായിരുന്നുവെന്നും അവർ കൂട്ടിച്ചേർത്തു.
