പത്തനംതിട്ട: അടൂർ പോലീസ് സ്റ്റേഷനിൽ രാജൻ ജോസഫിനെതിരെ മർദ്ദനമൊന്നും നടന്നിട്ടില്ലെന്നും, പരാതി നൽകിയ യുവാക്കളുടെ സ്വാഭാവികമായ പ്രതികരണം മാത്രമാണ് അവിടെയുണ്ടായതെന്നും വ്യക്തമാക്കി യൂത്ത് കോൺഗ്രസ് നേതാവ് ഫെനി നൈനാൻ രംഗത്ത്. തനിക്ക് മർദ്ദനമേറ്റിട്ടില്ലെന്ന് രാജൻ ജോസഫ് തന്നെ ഫേസ്ബുക്ക് പോസ്റ്റിൽ വ്യക്തമാക്കിയിട്ടുണ്ടെന്നും നിയമം കയ്യിലെടുക്കാൻ തങ്ങൾക്ക് താല്പര്യമില്ലെന്നും അദ്ദേഹം പ്രതികരിച്ചു. തട്ടിപ്പ് കേസിൽ പ്രതിയെ പിടികൂടുമ്പോൾ തട്ടിപ്പിനിരയായവർ സ്റ്റേഷനിൽ തടിച്ചുകൂടുന്നത് പോലെ, പരാതി നൽകിയിട്ടും നീതി കിട്ടാത്ത യുവാക്കളാണ് സ്റ്റേഷനിലെത്തിയതെന്നും പോലീസ് ജീപ്പിലിരുന്ന് ഇനിയും വീഡിയോ ചെയ്യുമെന്ന് രാജൻ ജോസഫ് പറഞ്ഞിരുന്നതായും ഫെനി കൂട്ടിച്ചേർത്തു.