തിരുവനന്തപുരം: ബോർഡ്-കോർപ്പറേഷൻ ചെയർമാൻമാരുടെ പ്രഥമ പട്ടിക മുഖ്യമന്ത്രിക്ക് കൈമാറി മുസ്ലിം ലീഗ്. സ്റ്റീൽ ഇൻഡസ്ട്രിയൽ കേരള ലിമിറ്റഡിന്റെ തലപ്പത്തേക്ക് ലീഗ് സംസ്ഥാന ജനറൽ സെക്രട്ടറി പി.എം.എ. സലാമിന്റെ പേരാണ് നിർദ്ദേശിച്ചിരിക്കുന്നത്. സിഡ്കോ അധ്യക്ഷനായി സി.പി. സൈതലവിയെയും വനിതാ വികസന കോർപ്പറേഷൻ ചെയർപേഴ്സണായി സുഹ്റ മമ്പാടിനെയും കെ.എസ്.എം.ഡി.എഫ്.സി ചെയർമാനായി യൂത്ത് ലീഗ് സംസ്ഥാന ട്രഷറർ ഇസ്മയിൽ വയനാടിനെയും കെൽ ചെയർമാനായി ടി.എം. സലീമിനെയുമാണ് പാർട്ടി ശുപാർശ ചെയ്തത്; പി.എസ്.സി അംഗത്വം രണ്ടര വർഷം വീതം വീതിക്കുന്നതിൽ ആദ്യ ടേമിൽ ഷാഫി ചാലിയത്തെ ഉൾപ്പെടുത്താനും തീരുമാനമായിട്ടുണ്ട്.
എംഎൽഎമാരുടെ പ്രാതിനിധ്യം ചൂണ്ടിക്കാട്ടി കോർപ്പറേഷൻ നിയമനങ്ങളിൽ കൂടുതൽ പദവികൾ വേണമെന്ന് കോൺഗ്രസ് മുന്നണിയിൽ ആവശ്യമുന്നയിച്ചിട്ടുണ്ട്. മുഖ്യമന്ത്രി വി.ഡി. സതീശന്റെ നേതൃത്വത്തിൽ അന്തിമ തീരുമാനങ്ങൾക്കായി ചർച്ചകൾ തുടരവേ, ബോർഡ് സ്ഥാനങ്ങളിലേക്ക് കെപിസിസി പ്രത്യേക മാർഗ്ഗരേഖയും നിശ്ചയിച്ചു. നിയമസഭാ തെരഞ്ഞെടുപ്പിൽ മത്സരിച്ചവരെയോ മുൻ ജനപ്രതിനിധികളെയോ പരിഗണിക്കാതെ, കെപിസിസി ഭാരവാഹികൾക്കും ഡിസിസി പ്രസിഡന്റുമാർക്കും മുൻഗണന നൽകാനാണ് കോൺഗ്രസ് തീരുമാനം.
അതേസമയം, കോൺഗ്രസ് കൈവശം വെച്ചിരിക്കുന്ന കെടിഡിസി ചെയർമാൻ സ്ഥാനം പി.വി. അൻവറിന് നൽകില്ലെന്നാണ് പുറത്തുവരുന്ന വിവരങ്ങൾ. ബേപ്പൂരിൽ മത്സരിക്കുമ്പോൾ മുന്നണി നൽകിയ ഉറപ്പുകൾ പാലിക്കപ്പെട്ടില്ലെങ്കിലും കെടിഡിസി പദവി വേണമെന്നും മുന്നണിയിൽ തനിക്ക് അർഹമായ പരിഗണന നൽകണമെന്നും ആവശ്യപ്പെട്ട് അൻവർ മുഖ്യമന്ത്രിയെ സമീപിച്ചിട്ടുണ്ട്.
