തിരുവനന്തപുരം: ഫിഷറീസ് എക്സ്റ്റൻഷൻ ഓഫീസർ പരീക്ഷാ തട്ടിപ്പ് കേസിൽ പിഎസ്‌സി ചെയർമാൻ ഡോക്ടർ എം.ആർ. ബൈജുവിനെ പ്രതിയാക്കി ക്രൈംബ്രാഞ്ച് പ്രത്യേക അന്വേഷണ സംഘം (എസ്‌ഐടി) എഫ്ഐആർ രജിസ്റ്റർ ചെയ്തു. ചെയർമാന് പുറമെ പിഎസ്‌സി അംഗങ്ങളെയും മറ്റ് ഉദ്യോഗസ്ഥരെയും കേസിൽ പ്രതിചേർത്തിട്ടുണ്ട്; പരീക്ഷയിൽ തിരിമറി നടത്തി അർഹരായ ഉദ്യോഗാർത്ഥികളുടെ നിയമന അവസരങ്ങൾ ഇല്ലാതാക്കിയെന്നാണ് എഫ്ഐആറിലെ കണ്ടെത്തൽ.
നേരത്തെ പ്ലാനിംഗ് ബോർഡ് പരീക്ഷാ ക്രമക്കേടുമായി ബന്ധപ്പെട്ട് ഉയർന്ന പരാതികൾക്ക് പിന്നാലെ ഖാദി ബോർഡ്, ഫിഷറീസ് എക്സ്റ്റൻഷൻ ഓഫീസർ, എംവിഡി അസിസ്റ്റന്റ് ഇൻസ്പെക്ടർ എന്നീ മൂന്ന് തസ്തികകളിലെ പരീക്ഷകളിലും ക്രമക്കേട് ആരോപണങ്ങൾ ഉയർന്നിരുന്നു. ഇതിൽ രണ്ട് സംഭവങ്ങളിൽ എസ്‌ഐടി നിയമനടപടി സ്വീകരിക്കുമെന്ന റിപ്പോർട്ടുകൾക്ക് തൊട്ടുപിന്നാലെയാണ് പിഎസ്‌സി ചെയർമാനെ ഉൾപ്പെടുത്തി പോലീസ് നടപടി കർശനമാക്കിയത്.
