തിരുവനന്തപുരം: ചേരാനല്ലൂർ ബെൻസ് കാറപകടക്കേസിൽ പൊലീസിന്റെ ഭാഗത്തുനിന്നുണ്ടായ ഗുരുതര വീഴ്ചകൾ വ്യക്തമാക്കി സസ്പെൻഷൻ ഉത്തരവ് പുറത്തിറങ്ങി. പരാതിക്കാരുടെ ഫോണിൽ നിന്നു ദൃശ്യങ്ങൾ ഗ്രേഡ് എസ്.ഐ കെ.ടി. മനോജും സീനിയർ സി.പി.ഒ അരുൺ ജോസിയും ചേർന്ന് നിർബന്ധപൂർവ്വം ഡിലീറ്റ് ചെയ്യിപ്പിച്ചതായും, വ്യക്തമായ കാരണങ്ങളുണ്ടായിട്ടും ഭാരതീയ ന്യായ സംഹിതയിലെ (ബിഎൻഎസ്) 105-ാം വകുപ്പ് ചുമത്താതെ മനഃപൂർവം ഒഴിവാക്കിയെന്നും ഉത്തരവിൽ അക്കമിട്ടു നിരത്തുന്നു.
ഇതിനിടെ, വാഹനം ഓടിച്ച പതിനേഴുകാരന്റെ ജാമ്യം റദ്ദാക്കണമെന്ന ഹർജി പരിഗണിക്കുന്ന കോടതി മാറ്റി. കേസ് അഡീഷണൽ സെഷൻസ് കോടതി രണ്ടിൽ നിന്ന് സ്ത്രീകളുടെയും കുട്ടികളുടെയും കേസുകൾ കൈകാര്യം ചെയ്യുന്ന കോടതിയിലേക്കാണ് മാറ്റിയത്; ജാമ്യം റദ്ദാക്കണമെന്ന് ആവശ്യപ്പെട്ട് പൊലീസും മരിച്ച മഞ്ഞാലി സ്വദേശി ജയബാലകൃഷ്ണന്റെ (55) കുടുംബവും കോടതിയെ സമീപിച്ചിരുന്നു. കടുത്ത ജനരോഷം ഉയർന്നതോടെ, പ്രായപൂർത്തിയാകാത്തയാൾ വരുത്തുന്ന അപകടങ്ങൾക്ക് രക്ഷിതാവിനെയോ വാഹന ഉടമയെയോ പ്രതിയാക്കുന്ന മോട്ടോർ വെഹിക്കിൾ ആക്ട് 199 എ പ്രകാരം കുട്ടിയുടെ പിതാവായ അഡീഷണൽ ജഡ്ജിക്കെതിരെയും പൊലീസ് കേസെടുത്തിട്ടുണ്ട്.
ഞായറാഴ്ച പുലർച്ചെ അമിതവേഗതയിൽ ബെൻസ് കാർ ഓടിക്കുന്നതിന്റെ റീൽസ് പകർത്താൻ രാത്രി വൈകി ഇറങ്ങിയപ്പോഴാണ് സ്കൂട്ടർ യാത്രക്കാരനായ ജയബാലകൃഷ്ണനെ ഇടിച്ചുതെറിപ്പിച്ചത്. പതിവായി വാഹനമോടിക്കുന്ന ഈ പതിനേഴുകാരൻ അപകടത്തിന് തൊട്ടുമുമ്പ് മണിക്കൂറിൽ 104 കിലോമീറ്റർ വേഗതയിൽ കാറോടിക്കുന്നതിന്റെ ദൃശ്യങ്ങൾ പൊലീസിന് ലഭിച്ചിട്ടുണ്ട്.
