കൊച്ചി: ചേരാനല്ലൂർ വാഹനാപകടക്കേസിൽ പ്രതിയായ പതിനേഴുകാരന്റെ ജാമ്യം റദ്ദാക്കണമെന്ന് ആവശ്യപ്പെട്ട് പോലീസ് എറണാകുളം സെഷൻസ് കോടതിയെ സമീപിച്ചു. ജില്ലാ ക്രൈംബ്രാഞ്ച് അന്വേഷണം ഏറ്റെടുത്ത കേസിൽ, പ്രതിയുടെ പിതാവായ ജഡ്ജിയെ പോലീസ് ചോദ്യം ചെയ്തു. ആലുവ കമ്പനിപ്പടിയിലെ ഫ്ലാറ്റിലെത്തിയാണ് അന്വേഷണസംഘം മൊഴിയെടുത്തത്. തന്റെ അറിവോടെയല്ല മകൻ വാഹനം ഓടിച്ചതെന്നാണ് വാഹനത്തിന്റെ ആർസി ഉടമ കൂടിയായ ജഡ്ജിയുടെ മൊഴി; ഇദ്ദേഹത്തെ കേസിൽ പ്രതിചേർത്തിട്ടുണ്ട്.
അപകടമുണ്ടാക്കിയ ബെൻസ് കാറിന്റെ ആർസി സസ്പെൻഡ് ചെയ്യുന്നതിനൊപ്പം പ്രതിയായ കൗമാരക്കാരനെതിരെ കർശന നടപടിക്കൊരുങ്ങുകയാണ് മോട്ടോർ വാഹനവകുപ്പ്. മോട്ടോർ വെഹിക്കിൾ ആക്ട് പ്രകാരം 25 വയസ്സ് തികയുന്നതുവരെ ഇയാൾക്ക് ഡ്രൈവിങ് ലൈസൻസ് എടുക്കുന്നതിന് വിലക്കേർപ്പെടുത്താനാണ് വകുപ്പിന്റെ തീരുമാനം.
