മലപ്പുറം: വഖഫ് ബോർഡ് പുനഃസംഘടനയിൽ പ്രാതിനിധ്യം ഉറപ്പുനൽകിയ മുഖ്യമന്ത്രി വാക്ക് പാലിക്കാതെ വഞ്ചിച്ചതായി കേരള മുസ്‌ലിം ജമാഅത്ത് നേതാവ് വടശ്ശേരി ഹസൻ മുസ്‌ലിയാർ. 'ടീം യുഡിഎഫ്' എന്ന് തുടക്കത്തിൽ പറഞ്ഞ സതീശൻ വാഗ്ദാനം ലംഘിച്ചുവെന്നും അദ്ദേഹം വാർത്താസമ്മേളനത്തിൽ കുറ്റപ്പെടുത്തി.
വഖഫ് ബോർഡ് പുനഃസംഘടനയിലൂടെ സുന്നികൾക്ക് നീതി നിഷേധിക്കപ്പെട്ടുവെന്നും പേരിന് മാത്രം വഖഫ് കാര്യങ്ങൾ കൈകാര്യം ചെയ്യുന്നവർക്ക് പ്രാതിനിധ്യം നൽകിയപ്പോൾ ഭൂരിപക്ഷ സുന്നി വിഭാഗത്തെ നോക്കുകുത്തിയാക്കുകയാണ് ചെയ്തതെന്നും അദ്ദേഹം ആരോപിച്ചു. സമസ്ത ഇ കെ വിഭാഗത്തെയും പരിഗണിക്കാതെ മാറ്റിനിർത്തിയതോടെ സമസ്തയിലെ ഇരുവിഭാഗങ്ങളും അവഗണിക്കപ്പെടുകയാണുണ്ടായതെന്നും അദ്ദേഹം ചൂണ്ടിക്കാട്ടി.
ഒരുമയോടെ മുന്നോട്ട് പോകാനുള്ള സാഹചര്യം നഷ്ടപ്പെടുത്തിയത് മുസ്‌ലിം ലീഗാണെന്നും അതേസമയം ചർച്ചകളോട് തങ്ങൾ പുറംതിരിഞ്ഞു നിൽക്കില്ലെന്നും വടശ്ശേരി ഹസൻ മുസ്‌ലിയാർ വ്യക്തമാക്കി.
