കൊച്ചി: മൂന്ന് പേരുടെ മരണത്തിനിടയാക്കിയ നെടുമ്പാശ്ശേരി മിനികൂപ്പർ കാറപകടക്കേസ് അന്വേഷിക്കാൻ എറണാകുളം റൂറൽ എസ്പിയുടെ മേൽനോട്ടത്തിൽ പ്രത്യേക അന്വേഷണ സംഘത്തെ നിയോഗിച്ചു. ആലുവ ഡിവൈഎസ്പി ബൈജു കെ. പൗലോസിനാണ് അന്വേഷണത്തിന്റെ പൂർണ്ണ ചുമതല. ഇതിനിടെ, കേസിലെ പ്രധാന പ്രതി സുഹൈൽ സജീവിനെ ചോദ്യം ചെയ്യാൻ കസ്റ്റഡിയിൽ വേണമെന്ന പോലീസിന്റെ അപേക്ഷ അങ്കമാലി മജിസ്ട്രേറ്റ് കോടതി പരിഗണിച്ചു.
പ്രതികൾക്കെതിരെ കോടതിയിൽ ശക്തമായ വാദങ്ങളാണ് പ്രോസിക്യൂഷൻ ഉന്നയിച്ചത്. ഉച്ചയ്ക്ക് തുടങ്ങിയ മദ്യപാനം പിന്നീട് മാരിയറ്റ് ഹോട്ടലിലും തുടർന്ന് അമിതമായി മദ്യപിച്ച ശേഷമാണ് പ്രതികൾ അശ്രദ്ധമായും അമിതവേഗതയിലും വാഹനം ഓടിച്ചതെന്നും, മദ്യപിച്ച് വണ്ടിയോടിച്ചാൽ അപകടമുണ്ടാകുമെന്ന് ഇവർക്ക് അറിയാമായിരുന്നില്ലേ എന്നും പ്രോസിക്യൂഷൻ ചോദിച്ചു. നിരവധി സ്വപ്നങ്ങളുണ്ടായിരുന്ന ചെറുപ്പക്കാരാണ് മരിച്ചതെന്നും, അതിനാൽ പ്രതികൾക്ക് പ്രായം കുറവാണെന്ന ആനുകൂല്യം ഒരു കാരണവശാലും നൽകരുതെന്നും സമഗ്രമായ അന്വേഷണം അനിവാര്യമാണെന്നും പ്രോസിക്യൂഷൻ കോടതിയെ അറിയിച്ചു.
അതേസമയം, മരണത്തെ ന്യായീകരിക്കുന്നില്ലെന്നും എന്നാൽ മാധ്യമങ്ങളെ തൃപ്തിപ്പെടുത്താനല്ല സത്യസന്ധമായ അന്വേഷണമാണ് ആവശ്യമെന്നും പ്രതിഭാഗം വാദിച്ചു. പ്രതികളുടെ അറസ്റ്റ് മാധ്യമങ്ങൾ ആഘോഷമാക്കിയെന്നും ഇവരെ മാധ്യമങ്ങൾക്ക് മുന്നിൽ പ്രദർശിപ്പിച്ചുവെന്നും ആരോപിച്ച പ്രതിഭാഗം, കേസിന്റെ അന്ത്യം പോലീസ് നേരത്തെ തന്നെ തീരുമാനിച്ചുറപ്പിച്ചിരിക്കുകയാണെന്നും സ്കൂട്ടറിൽ സഞ്ചരിച്ചിരുന്നവർ ആരും ഹെൽമറ്റ് ധരിച്ചിരുന്നില്ലെന്നും കോടതിയിൽ ചൂണ്ടിക്കാട്ടി.
