പാലക്കാട്: ഉത്സവ ആഘോഷങ്ങൾക്കിടെ യുവതിയെ മർദിച്ചെന്ന പരാതിയിൽ ബിജെപി തരൂർ പഞ്ചായത്ത് ജനറൽ സെക്രട്ടറി കൃഷ്ണകുമാർ ഉൾപ്പെടെ ആറ് പ്രവർത്തകർക്കെതിരെ ആലത്തൂർ പോലീസ് കേസെടുത്തു. തരൂർ സ്വദേശിനിയായ യുവതി നൽകിയ പരാതിയുടെ അടിസ്ഥാനത്തിലാണ് പോലീസ് നടപടി.
കഴിഞ്ഞ പതിനൊന്നാം തീയതി തരൂർ പഴമ്പാലക്കോട് ഭജന മഹോത്സവത്തിനിടെയാണ് കേസിനാസ്പദമായ സംഭവം നടന്നത്. പരിപാടിയുടെ സംഘാടകരായ ബിജെപി പ്രവർത്തകർ തന്റെ അമ്മാവനെ ആക്രമിക്കുന്നത് കണ്ട് തടയാൻ ശ്രമിച്ചപ്പോൾ ഇവർ തന്നെയും ശാരീരികമായി ഉപദ്രവിക്കുകയായിരുന്നുവെന്ന് യുവതി പരാതിയിൽ വ്യക്തമാക്കുന്നു.
അതേസമയം, ഉത്സവത്തിനിടെ സംഘർഷമുണ്ടായി എന്ന കാര്യം സമ്മതിച്ച ആരോപണവിധേയർ, യുവതിക്ക് നേരെ യാതൊരുവിധ ആക്രമണവും നടന്നിട്ടില്ലെന്നും തങ്ങൾക്കെതിരെ നൽകിയത് വ്യാജ പരാതിയാണെന്നും അവകാശപ്പെട്ടു.
